VOV4.Jarai - Amăng rơnuk anai, đah kơmơi ƀu djơ̆ kơnong kơ gơgrong bruă amăng sang đôč ôh mơ̆ gơñu dô̆ gum hrom klă amăng hơdôm bruă mơnuih mơnam dong. Yua anun, kiăng djă pioh sang anô̆ hăng pơdŏng sa bôh sang anô̆ yâu mơ-ak, gơñu khom thâo dưm dăp bruă mă dua bơnah sang anô̆ hăng bruă mơnuih mơnam mơng pô, tô nao rai hăng rŭ tơgŭ tơlơi gum djru mơnuih amăng sang anô̆.

Hăng sa čô khua sa Anom pơtô pơhrăm tơlơi dŏ dŏng ƀong huă kơ čơđai muai, ƀơi plơi prong Buôn Ma Thuột, tơring čar Daklak, samơ̆ bruă mă mơng amai Dương Thị Thu HIền glăi ƀu djơ̆ kơnong kơ mă ƀơi plơi prong đôč ôh mơ̆, ƀơi djop tơring čar Daklak, đa lĕ hmâo hơdôm bruă mă ƀơi lu tơring čar, ƀôn prong amăng đơ đam dêh čar ta dong. Wot dua rơkơi bơnai ñu juăt nao mă bruă pơ̆ anih ataih sui hrơi, anun tơlơi hơdĭp sang anô̆ ƀu ƀiă bưp tơlơi tơnap. Amai Dương Thị Thu Hiền lăi pơthâo, kiăng dưm kơnar bruă mă hăng sang anô̆, dua rơkơi bơnai leng kơ lăng yôm tơlơi thâo hluh, pran jua kiăng khăp hăng tơlơi gum djru.

“Bruă đah rơkơi thâo hluh bruă mă mơng đah kơmơi, păp ñai, thâo hluh hăng gum djru hơdôm bruă mă amăng sang anô̆ jing yôm phăn biă. Bruă amăng sang anô̆ lĕ bruă hrom. Hăng kiăng dưi hluh tơlơi anun sit yơh pô đah rơkơi khom hmâo hluh bơnai pô hăng bơnai pô khom thâo hluh rơkơi anun hiưm ñu kiăng gum hrom djru nao rai. Hăng kiăng gum djru tơdruă kơjăp khom dô̆ bơră ruai nao rai hăng sit nik pơdah tơlơi thâo tơngiă hăng kiăng khăp mơng pô pioh kơ bruă pô adih hăng sa tơlơi kiăng khăp sit nik pioh kơ sang anô̆ mơng pô. Hăng hơdră anai drơi pô kâo ăt dưi ngă mơ-ak mơn amăng sang anô̆ pô”.

Amai Dương Thị Thu Hiền lăi pơthâo, kiăng dưi mă rah bruă kơnuk kơna hăng bruă sang rah, 2 rơkơi bơnai leng kơ lăng yôm tơlơi thâo nao rai, pran jua kiăng khăp hăng tơlơi gum djru 

Tui hăng amai Lưu Thị Thu Hiền, sa čô mơnuih bơwih ƀong ƀơi Daklak lĕ, kiăng bư̆ bôr tơlơi yâu mơ-ak sang anô̆, đah kơmơi khă gun lu bruă ăt khom pơdah mơn pran jua kiăng khăp mơng pô hăng hơdôm bruă mă rơđah rơđông. Yua anun, khă git gai sa bôh sang bruă, samơ̆ ƀiă biă mă ñu rim rơwang hrơi tơjuh hơdôm wot, ñu ăt tơnă hơbai kơ ană rơkơi ñu mơn. Rim hrơi, abih bang sang ñu ƀong huă tơhrơi dŏng; rơnuč rơwang hrơi tơjuh gum hrom nao ƀong mơguah, ră ruai; hmâo bruă phrâo hơget thơ lăi pơthâo, đa lĕ dô̆ bơrơjah nao rai dong... lĕ hơdôm bruă djru kơ tơlơi yâu mơ-ak sang anô̆ kơjăp phik.

“Rơkơi kâo ăt lăi kâo hmâo sa “tơngan phù thuỷ” kiăng dưi ngă brơi rơkơi kâo hăng ƀing ană kâo gum hrom bruă amăng sang hăng kâo. Khă hnun hai bôh nik lĕ kâo ăt khom pioh lu pran mơn kiăng kơ rơkơi kâo hăng ƀing ană kâo juăt hăng bruă mă mơ̆ kâo hmâo pơjing brơi, anun lĕ lăng yôm sang anô̆, gum djru bruă tơnă hơbai hăng kâo ăt djă pioh mơn phiăn juăt ƀong huă mơguah, čơtlăm, mơmot amăng sang anô̆”.

Khă gun bruă mơnuih mơnam, amai Lưu Thị Thu HIền (ao kơñĭ) ăt pioh lu mông kơ sang anô̆ mơn, hrom hăng ƀing ană bă găn rơgao hơdôm bruă mă

Tui hăng nai prin tha kơsem min gah pran jua tơlơi pơmin Lý Thị Mai – Khua Sang bruă kơsem min pran jua tơlơi pơmin ană mơnuih mă yua ƀôn prong Hồ Chí Minh, amăng tơlơi hơdip rơnuk anai, đah kơmơi jai hrơi pơdah bruă mă hăng tơlơi pơsit bruă gơgrong mơng pô amăng lu bruă mơng tơlơi hơdip mơnuih mơnam. Khă hnun hai, ƀu dưi hơngah lui mơn, bruă mă hăng bruă gơgrong mơng gơñu amăng sang anô̆ ăt jing yôm phăn mơn. Đah kơmơi jing pô gơgrong phun, pô djă pioh sang anô̆ kiăng bư̆ bôr tơlơi yâu mơ-ak sang anô̆, tô nao rai mơnuih amăng sang anô̆. Anun jing bruă gơgrong rah laih anun jing rah bruă mă mơ̆ gơñu khom gơgrong. Pơ̆ sang anô̆ hơpă leng kơ tui anun sôh, kiăng dưi ngă djơ̆ bruă mă hăng sang anô̆ hăng kiăo tui bruă mă, đah kơmơi khom gir run hloh lu biă. Hrom hăng anun, gơñu khom ngă dưm kơnar hăng ngă mơ-ak wot dua bruă anun. Kiăng dưi ngă tơlơi anai, blung hlâo đah kơmơi kiăng hmâo bôh thâo hăng hơdôm tơlơi thâo thăi amăng dŏ dŏng ƀong huă, pơhiăp tlao, thâo ngă mơ-ak amăng tơlơi rô nao rai.

“Ƀing ta khom hmâo tơlơi mut hrom, anun lĕ ƀing ta nao mă bruă pơ̆ ƀirô lĕ ăt hmâo ƀing gŏp mơn, hmâo gưl dlông djru pô, hmâo wot ƀing gưl yŭ gum hrom hăng pô. Anun ăt jing hơdôm mơnuih ƀing ta kiăng hmâo bôh thâo pơhiăp tlao, mă bruă kiăng pô dưi jê̆ giăm nao rai hăng djop mơnuih anai pioh gum hrom, gum glăm ba bruă gơgrong hăng pô gah bruă mơnuih mơnam. Gah sang anô̆ kiăng hmâo tơlơi mơ-ak klă lĕ ƀing ta ƀu dưi ngă ha čô, khom hmâo tơlơi gum hrom mơng ană rơkơi, đa lĕ mơng mơnuih pơkon amăng sang anô̆, djă pioh bruă tô nao rai kơplah wah mơnuih amăng sang anô̆”.

Ƀu dô̆ kơnong kơ amăng rơwang amăng bruă asơi ia amăng sang anô̆ ôh mơ̆, đah kơmơi ră anai yak rơbiă gah rơngiao mơnuih mơnam, yak rơgao lu tơlơi gun hăng tơlơi tơnap kiăng pơsit bruă apăn mơng drơi pô. Kiăng ngă brơi kơ đah kơmơi dưi ngă tui bôh thâo mơng pô wot amăng pơđĭ kyar bruă mă hăng pơjing tơlơi yâu mơ-ak, khom hmâo tơlơi gir run, gum djru mơng mơnuih amăng sang anô̆. Hmâo tui anun đah kơmơi mơng dưi gơgrong mơng pô bơnai, pô amĭ amăng sang anô̆, ngă giong rah bruă mă lom gum hrom amăng hơdôm bruă gah tơlơi hơdĭp mơda mơnuih mơnam./.

            H’ Xíu H’môk: Pô čih – Siu H’ Prăk: Pô pơblang