VOV4.Jarai - Amăng hơdôm hrơi rơgao, tơring čar Dak Lak pơphun brơi pơbjưp nao rai kơplah wah mơnuih nao plĕ hră hăng ƀing hơmâo anăn ba ruah ngă khua jơnum min pơ ala mơnuih ƀon sang tơring čar tal X, rơwang thun 2021-2026 ƀơi hơdôm anih plĕ hră.

Ƀơi hơdôm anih pơphun pơbưp mơnuih ƀon sang, tơdơi kơ hmư̆ tơlơi lăi pơthâo anăn ƀing khua, tơlơi prăp lui mơng ƀing tơbiă anăn ruah ngă khua jơnum min pơ ala mơnuih ƀon sang tơring čar tal 10, rơwang thun 2021-2026, ƀing plĕ hră hơmâo pơgôp hiăp lăi nao tơlơi čang rơmang mơng ƀing gơñu hăng ƀing hơmâo anăn ngă ba ruah ngă khua, lăi nao rai tơpă ară djŏp mơta tơlơi mơ̆ dua bơnah lăp đing nao.

Amăng jơlan hơdră ngă bruă, ƀing hơmâo anăn ruah kiăo tui bruă gơñu mă, đah mơng lăi nao hơdôm hơdră pơsir, hơdră ngă bruă lơ̆m dưi đĭ ngă khua pơ ala mơnuih ƀon sang tơring čar, kiăng djru pơđĭ kyar bơwih ƀong huă, mơnuih mơnam, pơtrut đĭ tơlơi rơgơi hyu pel ĕp, sem lăng mơng Khua jơnum min pơ ala mơnuih ƀon sang, pơgang ba tơlơi dưi lăp djơ̆ hăng mơnuih ƀon sang.

Amăng mông bưp, tui hăng tơlơi lăi glăi mơng mơnuih ƀon sang, hơdôm hơdră ngă bruă mơng ƀing tơbiă anăn ngă khua hơmâo lăng yôm, pơdah tơlơi gơgrong bruă mơng pô pơ ala brơi tơlơi dưi mơng mơnuih ƀon sang. Khă hnun, sa, dua tơlơi ăt lăi nao hrŏm hrŏm mơn, aka ƀu lăi dlăm ha mơta bruă ôh, aka ƀu hơmâo hơdră pơsir kơ hơdôm tơlơi ƀu djơ̆ ră anai ƀơi hơdôm anom bruă. Mơnuih kư tri Nguyễn Quyền, dŏ ƀơi phường Tân Thành, plơi prong Buôn Ma Thuột lăi tui anai:

“Hơdră ngă bruă mơng ƀing hơmâo anăn ba ruah ngă hiư̆m pă kiăng djơ̆ hăng tơlơi kiăng, lăi lĕ khŏm ngă. Bơ ră anai mơ̆ hơdră ngă bruă čih lu tơlơi samơ̆ aka ƀu djơ̆ tơlơi kiăng mơng mơnuih ƀon sang gơmơi. Yua hnun, ƀing gơmơi lăng bruă anai lĕ tơlơi gal, abih bang mơnuih dưi lăi tơlơi ƀing ta kiăng, bơlăi nao rai rơđah kơplah wah mơnuih ƀon sang hăng ƀing khua pơ ala brơi ană plơi, bơlăi nao rai hơdôm tơlơi ƀing ta kiăng ngă, đah mơng akŏ pơjing gong gai kơnuk kơna jai hrơi kơjăp kơtang, anun lĕ tơlơi kiăng mơng djŏp mơnuih nao plĕ hră”.

Anih pơbưp mơnuih ƀon sang ƀơi phường Tân Thành, plơi prong Buôn Ma Thuột.

Mơnuih ƀon sang ăt tơpă ară tơña kơ ƀing hơmâo tơbiă anăn ngă khua kơ hơdôm tơlơi bơdjơ̆ nao bruă gơñu glăk ngă, biă ñi amăng bruă man pơkra jơlan nao rai, hơdôm bruă man pơkra anih anom, gơnam yua mơng plơi pla; hơdôm kơčăo bruă hơmâo pok pơhai, tuh pơ alin hăng ngă giong laih samơ̆ aka bu tŭ yua, ƀu yua tơbua ôh. Mơnuih ƀon sang rơkâo ƀing hơmâo anăn ruah ngă khua tơdah dưi ngă khua amăng rơwang bruă pơ anăp kiăng hmư̆ tui tơlơi pơgôp hiăp mơng ană plơi pla, biă ñu amăng mông bơbưp mơnuih ƀon sang, hăng ngă bruă sit mơtăm ƀu djơ̆ lăi amăng bah soh ôh.

Mơng bruă pơhiăp tom, ƀing tơbiă anăn ba ruah ngă khua pơsit amra jê̆ giăm, pơhmư̆ tơlơi pơgôp hiăp mơng mơnuih ƀon sang đah mơng git gai pơsir hĭ ƀudah lăi pơthâo kơ anom bruă prong dưi pơsir brơi tơlơi kiăng mơng mơnuih ƀon sang; gơgrong ngă pô pơ ala brơi mơnuih ƀon sang. Hơdôm tơlơi pơgôp hiăp mơng mơnuih ƀon sang amra jing tơlơi yôm kiăng ƀing hơmâo anăn ba ruah ngă khua ngă pơgiong hơdră ngă bruă mơng ƀing gơñu amăng abih mông ruah khua ăt kah hăng tơdơi kơ dưi đi ngă khua pơ ala mơnuih ƀon sang tơring čar pơ anăp anao. Yă Vi Thị Kiều Chi, gah anih plĕ hră mrô sa, plơi prong Buôn Ma Thuột brơi thâo:

“Tơdơi kơ hmư̆ tơlơi pơgôp hiăp mơng mơnuih ƀon sang lĕ pô kâo ƀuh hrơi mông pơtŏp rơguăt bruă, bruă mă mơng pô kiăng pơđĭ tui dong, kơsem min hăng kiăo tui tơlơi hơmâo sit nik ăt kah hăng thâo rơđah tơlơi hơmâo ƀơi plơi pla, tui anun kah bruă kâo mă ăt kah hăng tơdơi anai tơdah dưi đĭ ngă khua pơ ala mơnuih ƀon sang tơring čar ăt hơmâo gru laih kiăng pô kâo dưi ngă giong jơlan hơdră ngă bruă mơng pô”.

Mơnuih ƀon sang hmư̆ ƀing hơmâo anăn ba ruah ngă khua lăi pơthâo anăn, bruă gơñu ngă.

Ƀơi anih plĕ hră mrô 9, tơring glông Čư̆ Kuin, ƀing hơmâo anăn ruah ngă khua hơmâo bưp rơbêh 150 čô mơnuih ƀon sang pơ ala brơi kơ să Čư̆ Êwi hăng Ea Hu. Jơlan hơdră ngă bruă mơng ƀing khua pơƀut nao kơ bruă thâo rơđah tơlơi hơmâo ƀơi plơi pla kiăng ba tơbiă hơdră pơtrut pơđĭ kyar bơwih ƀong huă, mơnuih mơnam tŭ yua hăng hơđong kơjăp, amăng anun pơƀut akŏ pơdong kual ngă hmua mă yua boh thâo phrâo; pơtrut đĭ tơlơi hơmâo mơng rim boh să či akŏ pơjing gơnam tam hmư̆ hing “rim boh să sa djuai gơnam”; gir man pơdong plơi pla phrâo, djru ba mơnuih tơnap tap, biă ñu bruă lŏm lui tơlơi rin rơpa; djă bong tơlơi rơnuk rơnua amăng plơi pla...

Mông jơnum čih pioh hơmâo 17 tơlơi đĭ pơhiăp hăng rơbêh 30 tơlơi pơgôp hiăp, rơkâo đĭ. Amăng anun, mơnuih ƀon sang kiăng ƀing tơbiă anăn ruah khua tơdah dưi ngă khua amra ngă bruă tơlơi ƀing gơñu lăi; pơđĭ tui tơlơi gơgrong bruă mơng pô ngă khua pơ ala mơnuih ƀon sang tơring čar, pơphô bruă čih pơkra tơlơi pơtrun lăp djơ̆, tŭ yua; lăi nao hrŏm hăng bruă mă, lăng ba tơlơi hơdip mơnuih ƀon sang; gir ba tơring glông Čư̆ Kuin jing tơring glông bơwih ƀong pơdrong mơng tơring čar. Mông jơnum kiăng bưp mơnuih ƀon sang, thâo hluh mơnuih hơmâo anăn ba ruah ngă khua, hluai tui anun, ruah mă ƀing dưi ngă khua pơ ala mơnuih ƀon sang tơring čar Dak Lak tal 10, rơwang thun 2021-2026./.

H’Xíu: Čih - Siu H’Mai: Pơblang