VOV4.Jarai - Tui tơlơi pơhing mơng GPJPVN pôr pơthâo, tơdơi kơ 12 thun dŏ tơguăn, mơnuih ƀon sang pơ kual dơnao ia Krông Pač Thượng hơmâo ba nao pơ anih dŏ phrâo laih. Djŏp gong gai glăk pơƀut ngă hơđong tơlơi hơdip kơ mơnuih ƀon sang ƀơi anai.

Sang anŏ yă Ma Thị Sinh, thôn 9, să Čư̆ San, tơring glông M’Drăk lĕ sa amăng hơdôm boh sang anŏ blung a ƀơi kual dơnao ia Krông Pač thượng hơmâo nao dŏ pơ anih dŏ phrâo mrô 1, să Čư̆ ELang, tơring glông Ea Kar. Tơdơi rơbêh 1 wơ̆t hrơi tơjuh, sang anŏ ñu glăk hơmâo gong gai djru pơkra sang, pơdong tơmeh, man pơnăng sang. Sang ñu hơmâo pơdong ƀơi anih rơhaih, giăm amăng lăm să mơn, hơmâo jơlan bê tông, hơmâo ia hơdjă ba nao tơl anih. 3 čô ană yă Sinh glăk hrăm gưl sa, hăng hrăm anih muai, ăt kiăo tui hrăm pơ sang hră phrâo mơn, ataih mơng sang aka ƀu truh 500 met lơi. Tơlơi hơdip phrâo ră anai mơ-ak mơn:

“Ƀing adơi ayong mơng să hơmâo lăng ba biă yơh, djru ba sang anŏ gơmơi pơdong sang, pŏng sang, yong, glăm gơnam đĭ trun. Să lăng ba tui anai jing phôn kơ pran biă. Sang anŏ kâo hơmâo 5 sao hmua pơdai, 5 sao đang, pơdi kơdih anai nao ngă yơh”.

Să Čư̆ Elang glăk djru ană plơi ƀơi anih dŏ phrâo hơđong tơlơi hơdip.

Ơi Trần Văn Thanh, Khua Jơnum min mơnuih ƀon sang să Čư̆ ELang, tơring glông Ea Kar brơi thâo, yap truh rơnuč blan 3, hơmâo laih 20 akŏ sang anŏ nao dŏ pơ anih dŏ phrâo mrô 1 ƀơi să anai. Yua kơjăp laih bruă djru ană plơi pla pơdong anih dŏ phrâo, yua hnun mơnuih amăng să ngă bruă hơdeč biă, kah pơpha bruă rơđah rơđông. Să pơhlôm brơi abih bang sang anŏ nao pơ dŏ anih phrâo lêng hơmâo djru ba soh đah mơng tañ hơđong tơlơi hơdip. Hăng hơdôm boh sang anŏ hơmâo nao dŏ pơ plơi phrâo, să pơhlôm brơi rim boh sang hơmâo 1 sao lŏn dŏ, 5 sao lŏn ngă pơdai hăng 5 sao đang, tui hăng tơlơi čar pơtrun. Bruă ngă hmua mơ-ak biă lơ̆m dơnao ia Ea Rơt, hơmâo amăng kơčăo bruă Krông Pač thượng mơn dŏ jê̆ anăm anih pơdong plơi phrâo mơtăm, brơi ia pruih kơ phun pla hơđong biă. Lơ̆m anun sang hră mơng anih muai truh gưl dua dŏ giăm ƀơi plơi phrâo mơn. Anai lĕ hơdôm tơlơi gêh gal kiăng neh met wa hơđong tơlơi hơdip.

“Să pơsit anai lĕ bruă čar yôm biă mă. Tui hăng akŏ bruă blung a lĕ să prăp lui mơnuih mơnam nao djru, kiăng lơ̆m ană plơi nao dŏ pơ adih lĕ ăt pơhlôm tơlơi hơdip mơn, rơnuk rơnua mơn, tơdơi kơ anun lĕ bruă ngă hmua pla pơjing”.

Kual plơi phrâo mơ-ak tơthơ̆, djơ̆ hăng tơlơi kiăng mơng mơnuih ƀon sang.

Tui hăng akŏ bruă, rơbêh 700 boh sang anŏ hăng giăm 4.000 čô mơnuih ƀơi 3 boh plơi, thôn 9, 10 hăng 11, să Čư̆ San, tơring glông M’Drăk amra hơmâo ba nao pơ anih dŏ phrâo mrô 1 să Čư̆ Elang hăng anih pơdong plơi phrâo mrô 2 să Čư̆ Bông, tơring glông Ea Kar pioh ngă kơčăo bruă pơkra dơnao ia Krông Pač thượng hơmâo nua 4.400 klai prăk. Blung a, mơnuih ƀon sang aka ƀu tŭ ư đơi ôh, yua hnun kơnong hơmâo 44 boh sang anŏ đôč rơkâo nao dŏ. Truh ră anai, hơmâo tơlơi jak iâu, juh alum mơng gong gai hăng gơñu lăng nao hơdôm boh sang nao dŏ hlâo lĕ tơlơi hơdip klă hloh, mrô sang anŏ rơkâo nao dŏ đĭ giăm 200 laih. Ơi Nguyễn Đức Thảo, Kơ-iăng khua Jơnum min mơnuih ƀon sang tơring glông M’Drăk brơi thâo, tơring glông glăk jak iâu mơnuih gum djru, ƀrô djru ană plơi pô̆ sang, ƀrô iâu pơthưr, juh alum kiăng abih bang mơnuih tŭ ư, đah mơng tañ ngă giong bruă pơdong plơi phrâo pơ kual dơnao ia Krông Pač thượng:

“Amăng hrơi blan pơ anăp, tơring glông amra pơtrut tañ bruă duh lŏn, čuk pơkra anih anom, iâu pơthưr mơnuih ƀon sang nao dŏ pơ plơi phrâo. Mơng bruă djru ană plơi nao dŏ pơ anih dŏ phrâo lĕ abih bang sang anŏ lêng tŭ yơh nao dŏ pơ anih mơ̆ tơring čar, tơring glông prăp lui”.  

Công Bắc: Čih - Siu H’Mai: Pơblang