VOV4.Jarai-Tlam lơ 14/5, H’Yim Kđoh, Kơ-iăng Khua jơnum min mơnuih ƀôn sang tơring čar Dak Lak pơsit, amăng tơring čar hơmâo dơ̆ng sa čô ƀă kman sars-cov-2. Pô anai pơdjơ̆ nao hăng mơnuih ƀă kman klin tal 3052 ƀơi Bắc Ninh anăn ñu V.Đ.D, thun tơkeng 1971, dŏ pơ phường Đạt Hiếu, plơi prong Buôn Hồ, tơring čar Dak Lak.

Truh lơ 14/5, D duăm pơiă drơi jăn, mă ia khak ñu ba pơčrang lĕ 2 wơ̆t ƀuh yơh kman sars-cov-2. Ră anai, anom bruă ia jrao hlăk ječ ameč hơduah ĕp mơnuih ñu hơmâo pơhiăp hrom, jĕ giăm kiăng hơmâo hơdră pơhlôm pơgang khut khăt anăm brơi klin Covid 19 ƀă hyu.

Tui anun yơh, truh ră anai tơring čar Dak Lak hơmâo čih pioh 3 čô mơnuih ƀă kman Covid 19. Anom bruă ia jrao hlăk brơi pơčlah abih 70 čô mơnuih dŏ pơtum pơ sang ia jrao, pơčlah pơ sang anŏ ƀu brơi tơbiă hyu 1.500 čô mơnuih.

Nay Jek: Pơblang