VOV4.Jarai - Tơdơi kơ 2 tal pơčrông sai ruah khua, Jơnum min djŏp djuai ania mơnuih mơnam Việt Nam tơring čar Dak Lak pơsit laih anăn ƀing khua dưi ba ruah ngă khua pơ ala mơnuih ƀon sang dêh čar hăng Jơnum min pơ ala mơnuih ƀon sang djŏp gưl. Hơdôm boh tơring glông, plơi prong hơmâo mă laih tơlơi pơgôp hiăp mơng mơnuih ƀon sang, anăp nao jơnum pơčrông sai tal 3, prăp lui giong laih mông jơnum ruah khua amăng abih bang. Tui hăng tơlơi lăi pơthâo mơng Jơnum min djŏp djuai ania mơnuih mơnam tơring čar, hơdôm tơlơi pơgôp hiăp, đăo gơnang mơng mơnuih pơ ala brơi ƀơi anih dŏ pơphun hiam, tơpă sit, rơđah rơđông, pơhlôm djơ̆ tơlơi pơkôl pơkă. Truh lơ 12/4, abih bang mơnuih tơbiă anăn ba ruah ngă khua pơ ala mơnuih ƀon sang dêh čar hăng jơnum min khua pơ ala mơnuih ƀon sang tơring čar Dak Lak ăt pơhlôm tơlơi đăo gơnang mơn, pơhlôm brơi mông jơnum pơčrông sai ruah khua tal 3 hơmâo pơphun djơ̆ hrơi. Ƀơi mông jơnum pơčrông sai ruah khua tal 2, Jơnum min djŏp djuai ania mơnuih mơnam Việt Nam tơring Dak Lak hơmâo čih hră 12 čô khua tơbiă anăn ba ruah ngă ding kơna khua pơ ala mơnuih ƀon sang dêh čar tal 15 hăng 138 čô mơnuih tơbiă anăn ruah ngă khua jơnum min pơ ala mơnuih ƀon sang tơring čar. Dak Lak him lăng pơphun jơnum pơčrông sai bruă ruah khua tal 3 amăng lơ 16/4.

Siu H’Mai: Pơblang