VOV4.Jarai-Tơring čar Dak Lak ră anai, hơmâo 19 boh sang măi drai ia apui lơtrik, jua pơkĕ apui lơtrik abih bang 825 MW, ia dơnao pơkong pioh rơbêh 1 klai 300 klăk met khô̆i. Ră anai, mông kơthel, hơjan hlim, hơdôm sang măi anai hơmâo pơpha bruă tơhan mă bruă hrơi mlam krăo lăng, ĕp hơdră pơgang rơnuk rơnua hơđong kơ bơnư̆ dơnao ia ăt kah hăng gleng nao kơ bruă pơgang klin Covid 19 hlăk ƀă hyu tơnap tap.

Dak Lak prăp lui pel ĕp djop ring bruă sang măi drai ia apui lơtrik anet prong

 amăng bơyan hơjan hlim ia ling dăo

Tui hăng ơi Công Hồng-Kơ-iăng khua Gơnong bruă tuh tia hăng sĭ mơdrô tơring čar Dak Lak, laih nao ĕp lăng hlâo kơ bơyan hơjan hlim, hơdôm sang măi drai ia apui lơtrik lêng kơ ngă djơ̆ tơlơi pơtrun laih anun mă yua rơnuk rơnua tui tơlơi pơkă amăng bơyan hơjan hlim; pơkra hơdră prăp lui tong ten pok pơhai ia tơdah ia kơtang blai hang. Yua kơ klin Covid 19 tơnap tap, anun djop sang măi khom ngă tui khut khăt mơ̆n wơ̆t hơdră pơgang klin, bruă mă wai lăng sang măi drai ia apui lơtrik, sĭ mơdrô hơmâo boh tŭ yua rah, pơgang tơlơi truh lŏn adai ngă hăng pơgang klin rah.

Nay Jek: Pơblang