VOV4.Jarai-Hăng tơhnal pơkă pơgang tong ten rơnuk rơnua bruă ruah khua, tơhan kông an tơring čar Dak Lak hlăk pok pơhai lu bruă mă pơgang kjăp tơlơi rơnuk rơnua hơđong bơwih brơi mông ruah khua pơ ala mơnuih ƀôn sang tal XV hăng ruah khua pơ ala mơnuih ƀôn sang djop gưl rơwang bruă thun 2021-2026.

Kông an Dak Lak pơphun hrơi blan hyu ĕp mă pơgăn tơlơi soh sat

Tui hăng Đại tá Lê Vinh Quy, Khua kông an Dak Lak lăi, tơhan kông an tơring čar ăt ngă tui hrơi blan hyu suh mă mơnuih soh, pơgăn ƀing soh sat, bruă ngă soh sat, brơi pơsir abih anih anom ngă rung răng kiăng pơgang rơnuk rơnua hơđong amăng mông ruah khua pơ ala mơnuih ƀôn sang tal XV hăng khua mua pơ ala mơnuih ƀôn sang djop gưl rơwang bruă thun 2021-2026.

Djop anom bruă tơhan kông an  pơpha bruă mă, pơkra hơdră dăp tơhan djop plơi, djop anih pơgang hơđong. Tơhan pơlih jơlan glông, tơhan pơlih blah ngă, tơhan pơlih 113 ăt pơđing na nao kơ ană plơi, kơtưn hyu ĕp, pơgang rơnuk rơnua amăng kual hăng jơlan glông, laih dơ̆ng ăt pơgang kjăp anih plĕ hră ruah khua hăng nao bưp mơnuih plĕ hră ruah khua.

Nay Jek: Pơblang