VOV4.Jarai - Jơnum min ruah khua tơring čar Dak Lak brơi thâo, tar ƀar tơring čar amra hơmâo 1.794 kual nao plĕ hră hăng 1.802 anih plĕ hră ruah Khua pơ ala mơnuih ƀon sang dêh čar tal 15 hăng khua jơnum min pơ ala mơnuih ƀon sang tơring čar rơwang thun 2021-2026. Ƀơi anăp klin kheng kơtang tui anun, hơdră pơhlôm rơnuk rơnua pơgang Covid-19 ƀơi kual anai amra hơmâo pơphun ngă klă, pơhlôm rơnuk rơnua kơ hrơi ruah khua pơ anăp. Anom bruă ia jrao Dak Lak glăk krăp lăng klin Covid-19 amăng lŏn ia hăng dêh čar tač rơngiao; pơhlôm ngă hrŏm kơjăp kơplah wah Anom bruă wai lăng bruă ruah khua hăng Anom git gai pơgang klin Covid-19 djŏp gưl. Anom bruă prăp lui mơnuih mă bruă, rơdêh, dram gơnam, ia jrao pre lui pơgang klin Covid-19 amăng hrơi ruah khua. Jơnum min ruah khua tơring čar Dak Lak kiăng hơdôm boh plơi pla ruah anih plĕ hră djơ̆ hăng tơlơi kiăng pơgang klin, hơmâo anih prong, rơhaih, đah mơng dưi dŏ pơataih nao rai lơ̆m nao plĕ hră. Abih bang mơnuih nao plĕ hră hăng ƀing djru bruă ruah khua khŏm gôm ƀô̆, rao tơngan hăng ia čơƀu.

Khua git gai tơring čar Dak Lak pel ĕp bruă ruah khua ƀơi plơi pla.

Siu H’Mai: Pơblang