VOV4.Jarai-Ƀơi anăp kơ tơlơi hŭi klin Covid 19 ƀă hyu tơnap tap ƀơi Dak Lak, tom brơi, lơ 9/5, Khua mua git gai phun Jơnum min djop djuai ania mơnuih mơnam Việt Nam tơring čar Dak Lak phrâo lăi pơthâo kơ bruă pơphun jơnum tui hơdră lăng nao rai amăng tivi, djop mông jơnum bưp mơnuih ƀôn sang plĕ hră, kiăng jak iâu plĕ hră mơ̆ng ƀing tơbiă anăn ruah ngă pô pơ ala mơnuih ƀôn sang dêh čar tal XV tơring čar Dak Lak.

Amăng dua hrơi, lơ 10 hăng lơ 11/5/2021, Jơnum min djop djuai ania mơnuih mơnam Việt Nam tơring čar Dak Lak amra pơphun jơnum lăng nao rai amăng tivi pioh kơ 15 čô mơnuih tơbiă anăn ruah ngă khua pơ ala mơnuih ƀôn sang dêh čar tal XV tơring čar bưp mơnuih plĕ hră ƀơi 3 boh anih pơphun plĕ hră ruah khua.

Bruă pơphun bưp mơ̆ng ataih kơnong lăng nao rai amăng tivi hăng mơnuih plĕ hră ruah khua mơ̆ng ƀing tơbiă anăn ruah khua pơ ala mơnuih ƀôn sang dêh čar tal XV tơring čar Dak Lak kiăng bruă bưp mơnuih ƀôn sang hơđong rơnuk rơnua, djơ̆ hăng tơlơi pơtrun pơhlôm, pơgang klin Covid 19, laih dơ̆ng, pơgang tơlơi dưi tŭ yua mơ̆ng ƀing tơbiă anăn djơ̆ hăng tơlơi phiăn pơtrun.

Nay Jek: Pơblang