VOV4.Jarai - Kiăng dưi hơmâo 30% mrô đah kơmơi dưi ngă khua Jơnum min pơ ala mơnuih ƀon sang djŏp gưl, Khul pơlir hơbit đah kơmơi tơring čar Dak Lak hơmâo pơphun Jơnum pơtŏp bruă brơi ƀing đah kơmơi blung a hơmâo tơbiă anăn ba ruah ngă khua Jơnum min pơ ala mơnuih ƀon sang djŏp gưl rơwang thun 2021-2026.

Ƀing khua mua hơmâo pơtŏp brơi bruă, hơmâo lăi pơthâo kơ tơlơi dưi ngă, bruă kiăng ngă, tơlơi dưi mơng Jơnum min pơ ala mơnuih ƀon sang djŏp gưl hăng khua pơ ala mơnuih ƀon sang djŏp gưl; sa, dua bruă bơwih ƀong huă - mơnuih mơnam, gru grua mơng tơring čar amăng rơwang thun 2016-2021, hơdră ngă bruă rơwang thun 2021-2026. Pơtô brơi tơlơi rơgơi iâu pơthưr mơnuih ƀon sang plĕ hră ruah, hơdră lăi pơthâo tơlơi gơñu dưi ngă lơ̆m đĭ ngă khua jơnum min pơ ala mơnuih ƀon sang. Tui hăng Khul pơlir hơbit đah kơmơi Việt Nam tơring čar Dak Lak, kiăng prăp lui kơ mông ruah khua pơ ala mơnuih ƀon sang dêh čar tal 15 hăng khua jơnum min pơ ala mơnuih ƀon sang djŏp gưl rơwang thun 2021-2026, tơring čar amra pok 4 anih pơtŏp bruă ƀơi hơdôm boh tơring glông Krông Ana, Ea Hleo hăng plơi prong Buôn Ma Thuột, pioh kơ 300 čô khua tal blung a hơmâo tơbiă anăn ba ruah ngă Khua jơnum min pơ ala mơnuih ƀon sang djŏp gưl.

Siu H’Mai: Pơblang