VOV4.Jarai-Hăng bruă mă pơtrut tơlơi pơplông thâo pơčeh phrâo hơduah ĕp boh thâo ia rơgơi pioh kơ ƀing čơđai sang hră, hơdôm thun rơgao, bruă mă kơsem min boh thâo ia rơgơi mơ̆ng čơđai sang hră gưl dua, klâo ƀơi Dak Lak hơmâo tŭ mă lu tơlơi pơđing nao mơ̆ng ƀing nai pơtô hăng čơđai sang hră. Mơ̆ng anun, djru kơ čơđai sang hră hơmâo tơlơi gêh gal lu hloh hơduah ĕp, kơsem min pơčeh phrâo ia rơgơi tơpă sit hăng tŭ yua, lu tơlơi pơčeh phrâo, ring bruă yôm mă yua sit nik biă mă.

Hăng tơlơi kơsem min pơčeh phrâo anŏ djă lui pơgang răk pioh boh troh mơ̆ng gơnam pơkra ming hơmâo amăng glai klô laih, amôn Nguyễn Thị Tường Vi hăng Phan Thị Hằng, čơđai sang hră anih 9A1, sang hră gưl dua Tô Hiệu, să Ea Bông lĕ, grup kơsem min tal 2 tơring glông Krông Ana, tơring čar Dak Lak dưi hơmâo mă pri apah bơni amăng tal pơplông boh thâo ia rơgơi gưl dêh čar mơ̆ng čơđai sang hră gưl dua, klâo, yua Ding jum Pơtô hăng Pơjuăt pơphun thun 2021. Boh tơhnal mơ̆ng kơčăo kơsem min anai pơkra rai ia jrao pioh pơgang, pơkra mă mơ̆ng gơnam amăng glai, amăng sang, pơkra mơ̆ng kơđuh kơphê hăng hla mlu, hơmâo lu biă mă amăng kual plơi pla.

Nguyễn Thị Tường Vi hăng Phan Thị Hằng, čơđai sang hră anih 9A1, Sang hră gưl dua Tô Hiệu tơring glông Krông Ana, Dak Lak nao pă pri apah bơni pơplông boh thâo ia rơgơi pơčeh phrâo kơ čơđai sang hră gưl dêh čar

2 čô čơđai anai mơak biă mă yua anŏ gơñu kơsem min pơkra rai dưi pơsir 3 mơta anŏ kiăng sit nik rĭm hrơi, anun lĕ anŏ hơdjă ngă rơgoh mơnong ƀong huă, djru djă pioh răk lui boh troh đang hmua, hơmâo lu ƀơi plơi pla hăng djru hrom pơsir huăi ngă hơƀak jrak ayuh hyiăng lŏn glai anih hơdip jum dar, dơ̆ng mơ̆ng bruă kơ-uă kơphê, ƀơi tơring čar mơ̆ hơmâo kơphê lu hloh amăng dêh čar. Amôn Phan Thị Hằng lăi pơthâo:

"Kơphê lĕ djuai phun pla kah hăng kyâo sui thun lu biă mă. Samơ̆ lơ̆m kơ-uă kơphê arăng juăt kơ-uă dŏ asăt, mă yua ia, ia kơhñor mơ̆ng kơđuh kơphê hơmâo anăn Pectin tơbiă pơ anih hơdip jum dar lu biă mă, ñu ngă hơƀak jrak anih hơdip jum dar. Yua kơ anun ƀing gơmơi kiăng mă yua ia kơhñor pioh ngă ia jrao pơgang boh troh huăi tañ brŭ hiă, pơjing rai hruh ngă anŏ pơgang boh troh dưi răk lui sui huăi ngă brŭ hiă hơƀak jrak anih hơdip jum dar”.

Bơ amôn Nguyễn Thị Tường Vi brơi thâo:

“Anŏ ngă pơgang anun mơ̆ng gơmơi pơkra ming ñu phara hăng anŏ pơgang pơkŏn lĕ hơđong hăng huăi yua jrao sat. Lơ̆m gơmơi pơmin hơduah, kơsem ĕp pơkra anŏ pơgang djă pioh boh troh sui hloh, huăi tañ brŭ, čăt pơmao jing tơpơi ôh hăng djă lui sui hloh boh troh ta či ƀong”.

Ăt anăp nao bruă kiăng hơmâo biă mă ƀơi tơring čar, sa tơlơi kơsem min boh thâo ia rơgơi yua čơđai sang hră tơrign čar Dak Lak ngă pô, dưi hơmâo mă pri apah bơni gưl tơring čar laih anun mă pri mrô klâo gưl dêh čar Tal pơplông ia rơgơi tơlơi kơhnâo pơčeh phrâo mơ̆ng tơdăm ngek dra muai thun 2020, anun lĕ “Hơbô̆ bruă ƀuh arăng phă glai hăng apui ƀong glai mơ̆ng ataih”. Kơčăo bruă pơčeh phrâo anai, amôn Đỗ Lê Minh Quân hăng Trần Đại Lợi, čơđai sang hră anih 9, sang hră gưl dua Phan Bội Châu, plơi prong Ƀuôn Ma Thuôt, hơmâo mă yua arăt hrĕ pơkra apui lơtrik gư̆ kơtit git gai kiăng thâo krăn anŏ bơblih ayuh hyiăng hlor pơđiă, anŏ djrưh amăng ayuh hyiăng hăng thâo krăn jua ngañ kơtang yua măi uă kyâo amăng glai.

Đỗ Lê Minh Quân hăng Trần Đại Lợi, čơđai sang hră anih 9 sang hră gưl dua Phan Bội Châu, plơi prong Ƀuôn Ma Thuôt, Dak Lak lăi pơthâo hơbô̆ bruă pơkra ming pơčeh phrâo gơñu kiăng tañ thâo ƀuh arăng phă glai

hăng apui ƀong glai klô mơ̆ng ataih

Ñu hrip mă jua mơñi mrô pơyiong radio RF pioh hrip jua hăng pơthâo tui tơhnal ƀuh ƀơi pơnăng măi krăo lăng mơ̆ng ataih amăng rơwang 1 km mơkrah. Pơ anai, pô dŏ krăo lăng thâo krăn mơtam anŏ hlor, pơđiă, tơlơi pơhing kơ anŏ djrưh hăng jua mơñi amăng glai klô adih. Mơ̆ng anun thâo krăn mơtam jua mơñi mơ̆ng măi kơtang ñu phara ƀudah thâo krăn anŏ hlor pơđiă apui ƀong kơtang hloh hăng anŏ pơđiă tơđar hrơi pơjing rai.

Gơnam yua măi mok mok pơjing mă anai anet aneo đôč, hơbôt biă, amuñ amĕ, rơnoh prăk pơkra ƀiă mơ̆n, dưi djru kơ tơhan pơgang kyâo glai tañ thâo ƀuh hăng pơsir mơtam tơdah hơmâo tơlơi truh apui ƀong glai hăng ƀing klĕ dŏp uă kyâo ča čot. Amôn Đỗ Lê Minh Quân brơi thâo:

“Ƀơi plơi prong kâo ƀu hơmâo tơlơi gêh găl nao giăm glai klô đơi ôh, samơ̆ kâo ƀuh tơlơi gơgrong yom mơ̆ng glai klô tui hăng tơlơi hrăm amăng sang hră, amăng anih nai pơtô. Giong dưm truă, pơkra ming gơnam yua anai, gơmơi amra lông nao lăng pơ kual glai klô lông pơkă lăng kiăng pơkra ming djop hăng ngă giong hĭ măi anai.

Măi anai, nua sĭ năng ai 2 truh 3 klăk prăk. Kâo čang rơmang pơkra bơblih tui hơmâo jua tơdiăp mơñi ur pơthâo, amuñ hloh thâo krăn anŏ ta krăp lăng sŭ. Laih dơ̆ng ñu pơdah thâo hăng mrô tui hăng mrô telephôn hăng lu pơnăng pơƀuh ƀơi ƀô̆ măi pơkŏn yua mơ̆ng sa mrô đôč”.

Hơdôm thun giăm anai, tơlơi pơplông pơčeh phrâo ia rơgơi jai hrơi lu, pơhưč lu čơđai sang hră ƀơi Dak Lak ngă hrom, hơmâo rơbêh 100 mơta gơnam, kơčăo bruă kơsem min, mă yua sit nik, jĕ giăm hăng tơlơi hơdip mơda rĭm hrơi. Hơmâo sa, dua kơčăo bruă, gơnam yua ƀu kơnong pơdah thâo amăng tal pơplông đôč ôh, dŏ rơkâo čih anăn pơgang ngă pô thâo pơčeh phrâo ia rơgơi laih anun ba yua amăng bruă mă sit nik.

Kah hăng kơčăo bruă “Ia bơmun đung đĭ brơi kơ kual ia ling dăo hăng pơgang anŏ hơƀak jrak ia yua”, hlăk mă yua pơ kual anih juăt ia ling dăo ƀơi Dak Lak hăng hơdôm tơring čar kual Tong krah; Kơčăo bruă Rek ling mrô, pơčeh phrâo anŏ krăp lăng hăng wai lăng čơđai sang hră ƀơi hơdôm sang hră mơ̆ng grup čơđai sang hră gưl sa, gưl dua hăng gưl klâo Victory, plơi prong Ƀuôn Ma Thuôt ăt hlăk ngă pơgiong hĭ, amra dưi mă yua amăng sang hră gơñu pô.

 Ơi Đỗ Tường Hiệp, Kơ-iăng Khua Gơnong bruă Pơtô hăng Pơjuăt tơring čar Dak Lak lăi pơtong, hơdôm gơnam kơsem min pơkra ming ƀing čơđai sang hră pơčeh phrâo, brơi ƀuh, ƀing čơđai sang hră thâo pơmin, kơsem ĕp lu boh thâo ia rơgơi; thâo pơčeh phrâo, thâo ƀuh tañ laih anun čih pioh, čang rơmang ba yua sit nik amăng tơlơi hơdip mơda bơwih brơi kơ tơlơi dŏ dong ƀong huă rĭm hrơi.

“Tal pơplông boh thâo ia rơgơi jing sa bruă mă gah tơlơi thâo prong mơ̆ng djop sang hră. Hăng anŏ bơblih phrâo pơtô hrăm ră anai pok pơhai brơi kơsem min pơčeh phrâo pơtô hrăm sa amăng hơdôm boh yom phun hơdră pơtô hrăm amăng sang hră. Hơdôm sang hră khom pơtrut kơtang pơtô hrăm STEM, bruă mă găn rơgao sit nik tơlơi thâo, laih anun boh yom phun ñu tơlơi pơmin rơgơi pơčeh phrâo kơ bruă mă amăng sang hră”.

Kơnang kơ hơdôm tal pơplông pơčeh phrâo boh thâo ia rơgơi kơ tơdăm ngek dra muai hăng čơđai sang hră, bruă kơsem min boh thâo ia rơgơi dưi bang hyu truh pơ djop sang hră ƀơi Dak Lak. Mơ̆ng anun pơtrut ƀing adơi đeh ană amôn čơđai sang hră, mă yua boh thâo ia rơgơi hrăm amăng hơdrôm hră, ba yua sit nik amăng tơlơi hơdip.

Laih dơ̆ng, bruă ngă anai djru hrom bơblih phrâo hơdră pơtô hrăm tui anăp ngă pơđĭ kyar pran jua tơlơi rơgơi, dlô akŏ pơmin, tơlơi kơhnâo mơ̆ng čơđai sang hră amăng anom bruă pơtô pơjuăt, pơtô hrăm hră ƀơi tơring čar.

H’Xíu pô čih: Nay Jek: Pơblang