VOV4.Jarai - Tŏ tui bruă prăp lui ruah khua pơ ala mơnuih ƀon sang dêh čar tal 15 hăng Jơnum min khua pơ ala mơnuih ƀon sang rơwang thun 2021-2026, Khul khua apăn bruă Jơnum min djŏp djuai ania mơnuih mơnam Việt Nam tơring Dak Lak pơphun wai lăng, hơduah ĕp bruă ruah khua ƀơi hơdôm boh plơi pla amăng tơring čar. Mơng tơlơi pơtŏng lăng, abih bang plơi pla hơmâo ngă tui djơ̆ akŏ bruă laih, pơhlôm djơ̆ hrơi. Mơng lơ 8/4 truh lơ 13/4, Khul khua pơphun hơduah ĕp bruă ruah khua hăng tơring glông, să laih dong Grup khua Jơnum min djŏp djuai ania mơnuih mơnam ƀơi kual plơi pla tơring glông Čư̆ M’gar, Ea Kar, Krông Ana hăng Ea H’Leo. Tơlơi hơmâo krăp lăng lĕ: Krăp lăng bruă pok pơhai, lăi pơthâo rơđah tơlơi phiăn ruah khua; bruă akŏ pơdong hăng bruă mă mơng Jơnum min ruah khua, hơdôm anom bruă gơgrong wai lăng bruă ruah khua; bruă mă tơlơi pơgôp hiăp mơng mơnuih ƀon sang hăng pô hơmâo anăn ba ruah. Amăng hrơi blan pơ anăp, Jơnum min djŏp djuai ania mơnuih mơnam Việt Nam tơring čar Dak Lak pơphun 2 tal hyu hơduah tơña, krăp lăng bruă čih anăn mơnuih nao plĕ hră hăng bruă prăp lui kơthung plĕ hră, čih pơsit anăn ƀing tơbiă anăn ba ruah ngă khua, pơsir hĭ hră ngă kơđi, ƀŏm đĭ. Hrơi mông pel ĕp pơphun mơng lơ 15/4 truh abih lơ 30/4/2021.

Siu H’Mai: Pơblang