VOV4.Jarai - Dak Lak glăk amăng hrơi blan pơ-iă hang kơtang amăng bơyan phang thun 2020-2021 laih, mrô apui hơmâo mă yua lu tui mơn. Yua hnun, anom bruă apui lơtrik hơmâo ngă lu hơdră pơhlôm brơi apui yua rơnuk rơnua, hơmâo djŏp brơi mơnuih ƀon sang hăng anom bơwih ƀong yua amăng sang hăng pơkra gơnam tam. Kiăng pơhlôm măi pơđuăi jua apui lơtrik klă amăng bơyan không phang anai, Kông ti hơmâo dưm truă măi phrâo, pơkra ming hơdôm glông hrĕ tô nao rai pơkĕ apui ƀu klă; jŭ yap glăi abih hơdôm glông hrĕ pơkĕ jua apui kiăo tui bơyan, biă ñu ƀơi hơdôm kual kiăng hơmâo ia pruih lu đah mơng thâo prăp lui brơi apui yua lăp djơ̆ hăng tơlơi kiăng; hyu sem lăng na nao mơtăm glông hrĕ apui, măi rơ le, sem lăng tơlơi rơnuk rơnua ƀơi glông hrĕ apui jua kơtang. Hăng hơdôm anom bruă yua Kông ti wai lăng hơmâo krăp lăng mrô apui lơtrik ƀơi hơdôm anih pơđuăi jua apui đĭ trun đah mơng ngă hơđong mrô apui lơtrik hmao tlôn hăng prăp lui măi pơđuăi jua apui đĭ trun pơhlôm lui hlâo đah mơng brơi apui yua rơnuk rơnua, brơi apui hơmâo na nao kơ ƀing tuai blơi yua amăng kual.

Siu H’Mai: Pơblang