VOV4.Jarai - Ƀơi să Ea Sôr, tơring glông Ea Kar, tơring čar Dak Lak , hơmâo sa tơdron tuh čuah hơdôm rơbâo met khô̆i mơng sa grup bơwih ƀong gah pơtâo čuah, tuh lui bôr ƀơi Jơlan prong mrô 29. Tơdron čuah anai lĕ anih pơdŭ nao rai čuah mơng 3 boh tơring čar Phú Yên, Gia Lai hăng Dak Lak, hơmâo amăng 2 thun anai laih, lu wơ̆t laih mơnuih ƀon sang lăi pơthâo kơ gong gai samơ̆ ƀing ñu ƀu hŭi mơn.

Amăng ha hrơi rơnuč blan 4, gơmơi nao pơ tơdron tuh čuah ča čot ƀơi ƀuôn Ea Puk, să Ea Sôr, tơring glông Ea Kar, tơring čar Dak Lak. Ƀơi anai, hơmâo sa tơdron tuh čuah prong biă mă, hăng hơdôm rơbâo met khô̆i čuah tuh lui bôr giăm jơlan prong 26. Ƀơi tơdron čuah, pô wai lăng hơmâo pơdong sa boh sang pioh git gai wai lăng bruă sĭ mơdrô čuah, mơnuih mă bruă hơmâo giăm ha pluh čô mơnuih mơtăm. Ơi Hờ A Sủng, khua plơi Ea Puk brơi thâo, tơdron tuh čuah anai hơmâo mơng 2019 laih, lơ̆m hơmâo tơdron tuh čuah anai ngă ană plơi glêh yua biă mă. Hơmâo rơdêh prong, pơgiăng ba kơthung tuh čuah prong mơn, juăt mut nao rai tuh čuah, ngă răm abih jơlan, wơ̆t jơlan prong mrô 29 ăt răm mơn, amuñ hơmâo tơlơi truh pơjrom pơtlă biă, ngă kơ mơnuih ƀon sang bơngơ̆t hăng hil biă mă.

“Ană plơi lăi lu laih kơ bruă tơdron tuh čuah. Rơdêh prong, hơmâo mơng 15 truh 20 boh rơdêh juăt nao rai mă čuah. Amăng mông pơgiăng čuah lĕ ngă răm lu jơlan, ngă tơlơi hơdip mơnuih ƀon sang ƀing gơmơi rung răng lu biă. Neh met wa hơmâo lu tơlơi pơgôp hiăp laih, lăi pơthâo kơ să, să lăi pơthâo kơ tơring glông laih, glăk tơguăn tơring glông pơsir brơi hiư̆m pă, bơ ană plơi gơmơi ƀu thâo anŏ ngă ôh”.

Tơdron tuh čuah ča čot anai hơmâo amăng 2 thun anai laih.

Ơi Hoàng Anh Dũng, Kơ-iăng khua jơnum min mơnuih ƀon sang să Ea Sôr, tơring glông Ea Kar, brơi thâo, anih tuh čuah ča čot ƀơi ƀuôn Ea Puk dŏ amăng mrô lŏn 102, kiăo tui hră lơkak mrô 05, hăng đơ đam lŏn prong giăm 13.000m2. Đơ đam lŏn anai yua ơi Phan Đình Thái Anh (tơkeng thun 1979, dŏ ƀơi phường Thành Nhất, plơi prong Buôn Ma Thuột) ngă pô. Ơi Hoàng Anh Dũng pơsit, abih bang tơdron tuh čuah anai lĕ lŏn ngă hmua. Să pơsit anai ngă bruă ngă soh tơlơi phiăn mă yua lŏn. Amăng blan 3/2020, să Ea Sôr hơmâo akŏ pơdong grup hyu hơduah tơña hăng pơsit hơmâo năng ai ñu 10.000 met khô̆i čuah hơmâo tuh ča čot ƀơi anai. Să rơkâo laih kơ tơring glông pơsir tơlơi anai:

“Kơ tơlơi gơgrong bruă mơng kơnuk kơna lĕ să ƀu dưi pơsir bruă anai ôh. Să hơmâo laih hră git gai, khŏm hơmâo gưl prong git gai, pơsir kah mơng dưi”.

Hơdôm pluh boh rơdêh pơgiăng tuh čuah nao rai, ngă ană plơi ƀơi Ea Puk rơañ biă.

Bơdjơ̆ nao tơdron tuh čuah hơdôm rơbâo met khô̆i čuah soh phiăn hơmâo tuh lui bôr, giăm Jơlan prong mrô 29, ơi Nguyễn Ngọc Duần Khua Anom bruă Kông ngăn lŏn mơnai glai rưng hăng ayuh hyiăng tơring glông Ea Kar brơi thâo, tơring glông phrâo akŏ pơdong grup  pơtruh nao rai hơmâo anom bruă Kông ngăn lŏn mơnai glai rưng, kông ang, anom mă jia hơduah tơña, pel ĕp bruă anai. Blung a pơsit, anom bơwih ƀong mă yua lŏn ƀu djơ̆ tơlơi phiăn brơi mă yua. Hăng mrô čuah hơmâo tuh pơ anai, mơng tơlơi lăi pơhmư̆ mơng anom bơwih ƀong lĕ, čuah hơmâo mă hăng pơdŭ mơng tơring čar Phú Yên hăng Gia Lai. Grup pơlir hơbit anom bruă hơmâo pel ĕp hră pơ-ar duh prăk jia, aka ƀu thâo pơsit ôh mrô čuah anai djơ̆ tơlơi phiăn hă ƀŭ. Kơ bruă yua hơget anih tuh čuah ča čot ƀơi să hơmâo lăi pơthâo laih samơ̆ ăt dŏ na nao mơn mơng thun 2019 truh ră anai. Kơ bruă pơsir tơlơi soh, ơi Duẩn brơi thâo, tơring glông Ea Kar gir pơsir bruă, laih dong khŏm kiăng anom bơwih ƀong anai ba pơđuăi pơ anih pơkŏn, pioh glăi lŏn tui mơng hơđăp:

“Ƀơi anai lĕ bruă yua lŏn ƀu djơ̆ hăng tơlơi kiăng yua. Tơdơi kơ bơtơhmal hăng prăk lĕ khŏm pioh glăi lŏn tui hăng mơng hơđăp. Pơhmutu mrô čuah 3 met khô̆i lĕ amăng 30 hrơi khŏm pơsir”.

Sa anih tuh čuah ča čot prong hơdôm rơbâo met khô̆i, giăm ƀơi jơlan prong mrô 29, rơdêh nao rai tơket tơkeng, hơmâo lu mơnuih ƀuh, hơmâo lu mơnuih pơhiăp, samơ̆ amăng 2 thun rơgao ăt aka ƀu pơsir hĭ mơn. Tơlơi anai brơi ƀuh, bruă wai lăng lŏn tơnah, sĭ mơdrô pơtâo čuah ƀơi anai hơmâo tơlơi ƀu klă. Bruă arăng sĭ mơdrô čuah soh tơlơi phiăn amuñ hơmâo mơn.

Công Bắc:Čih - Siu H’Mai: Pơblang