VOV4.Jarai - Kơƀah ia yua glăk ngă tơlơi hơdip kơ giăm 500 boh sang anŏ ƀơi să Dak R’la, tơring glông Dak Mil, tơring čar Dak Nông bưp tơnap tap. Lu sang anŏ iâu arăng khuer ia bơmun rơngiă hơdôm pluh klăk prăk samơ̆ ăt ƀu hơmâo ia.

Rơbêh 1 blan giăm anai sang anŏ yă Trần Thị Bích Phượng hrŏm hăng lu sang anŏ ƀơi ƀut plơi 5, să Dak R’la khŏm pơgôp prăk rĭm hrơi, blơi hơdôm rơbâo lit ia ba glăi pơpha yua, yua ƀơi anai ia bơmun lêng kơ khŏt abih. Yă Phượng brơi thâo, bruă kơƀah ia yua ngă kơ tơlơi hơdip kơ neh met wa bưp tơnap tap biă mă. Djop sang anŏ lêng kơ jao sa čô mơnuih dŏ tơguăn mă ia lơ̆m arăng ba hyu pơpha.

Mơnuih ƀon sang ƀơi anai lêng kơƀah ia hăng khŏm blơi ia yua. Rĭm hrơi ƀing gơmơi blơi ia pioh yua giăm 1.500 lit, khŏm hlơi yơh tơdah kiăng hơmâo ia yua. Ƀing gơmơi čang rơmang gong gai ngă hiưm pă djru brơi ƀudah hơmâo đing đoh rai plơi pla ƀing gơmơi ia hơdjă kiăng kơ mơnuih ƀon sang hơmâo ia yua hăng hơđong tơlơi hơdip mơda.

Mơnuih ƀon sang pơčruih prăk blơi ia yua

Ƀu djơ̆ kơnong blơi ia yua rĭm hrơi đôč ôh sang anŏ yă Phạm Thị Vân, dŏ ƀơi ƀut plơi 3, să Dak R’la ăt rơngiă hơdôm pluh klăk prăk iâu arăng khuer ia bơmun. Yă Vân brơi thâo, sang anŏ pơpă bưng băi kah mơng khuer djơ̆ anih hơmâo ia bơ dŏ glăi lu sang anŏ mah khuer hơdôm rơtuh met ăt ƀu hơmâo ia lơi.

Ƀơi anai bruă khuer ia bơmun bưp tơnap tap biă mă. Sang anŏ gơmơi hơmâo mă yua 40 klăk prăk kiăng kơ khuer ia bơmun samơ̆ ăt bưp tơnap tap biă mă. Ră anai sang anŏ gơmơi ăt rơngiă prăk blơi ia yua rĭm hrơi mơn.

Kar kăi mơn, ƀơi ƀut plơi 2 ăt să anai mơn ră anai hơmâo 30 boh sang anŏ laih khuer ia bơmun kiăng kơ hơmâo ia yua, 28 boh ia bơmun khuer ƀu hơmâo ia. 3 amăng anun hơmâo gong gai djru khuer mơng hơdôm thun hlâo anun, ră anai ăt khŏt abih laih.

Sa, dua boh sang anŏ khuer ia bơmun

Tui hăng pel ĕp mơng Jơnum min mơnuih ƀon sang tơring čar să Dak R’la, đơ đam să ră anai hơmâo giăm 500 boh sang anŏ, hăng rơbêh 1.500 čô mơnih glăk kơƀah ia yua rĭm hrơi, lu hloh lĕ ƀơi ƀut plơi 2,3 hăng 4. Ơi Ngô Quang Văn, Kơ-iăng khua Jơnum min mơnuih ƀon sang tơring čar să Dak R’la brơi thâo hơdôm ƀut plơi pla anai lêng hăng kơdư, ataih mơng glông ia. Lơ̆m anun, đơ đam să hơmâo kơnong 1 ring bruă ia hơdjă ƀơi ƀut plơi 7, yua anun, ăt ƀu djop ia yua brơi mơnuih ƀon sang.

Gong gai ƀon lan hơmâo pơtrut mơnuih ƀon sang pơsir hĭ tơnap tap kiăng yua pơkrem ia, mă yua lăp djơ̆. Sui thun pơ anăp ƀơi să Dak R’la kual lŏn ƀơi anai khuer ia bơmun tơnap tap biă mă. Să rơkâo tơring čar hơmâo hơdră pơsir sui thun pơ anăp anun lĕ ƀô̆p ia hơdjă mơng dơnao ia Đu Ri 2 ƀơi ƀut plơi 5 hăng dưm măi ƀô̆p ia gah tlôn Jơnum min mơnuih ƀon sang tơring čar să kiăng kơ hơđoh nao djop plơi pla.

Bruă kơƀah ia yua amăng bơyan không phang ƀơi ƀut plơi Dak R’la ƀuh sui mơng hơdôm thun hlâo anun laih. Mơnuih ƀon sang kah hăng gong gai să čang rơmang djop gưl, gơnong bruă tañ djru brơi prăk kak kiăng kơ mơnuih ƀon sang amăng să hơmâo ia yua, ia pruih brơi phun pla.

Siu Đoan: Pơblang