VOV4.Jarai-Truh ră anai djop tơring glông, plơi pla amăng tơring čar Dak Nông hơmâo akŏ pơjing 680 grup pơphun bruă ruah khua pơ ala mơnuih ƀôn sang dêh čar tal XV hăng ƀing pơ ala mơnuih ƀôn sang djop gưl rơwang bruă thun 2021-2026, djơ̆ hrơi blan pơkă.

Tui hăng Jơnum min ruah khua tơring čar Dak Nông bruă prăp lui ruah khua djơ̆ hơdră laih. Ră anai, djop jơnum min mơnuih ƀôn sang tơring glông, plơi prong, să, phường, tơring kual hơmâo akŏ pơjing 680 kual anih nao plĕ hră. Amăng anun, 21 grup ruah khua jing anih plĕ hră phara kah hăng puih kơđông tơhan pơgang guai dêh čar, hơdôm puih tơhan, sang bruă  kông an tơring čar, sang bruă khua tơhan tơring čar, anih pơtô hrăm añ gơñ hot jrao.

Sa grup ruah khua hơmâo mơ̆ng 11-12 čô mơnuih mă bruă, khua grup, khua čih pioh hăng ding kơna amăng grup pơ ala kơ djop sang bruă kơnuk kơna, khul bruă kơđi čar, khul grup mơnuih mơnam mut phung hăng khul kơđi čar mơnuih mơnam laih anun khua mua pơ ala djop să.

Jơnum min ruah khua tơring čar rơkâo Jơnum min ruah khua dêh čar tŭ ư pơphun 13 grup ruah khua ƀơi 12 boh puih kơđông tơhan pơgang guai dêh čar hăng 1 tiểu đoàn pơtô hrăm blah ngă plĕ hră tañ hloh 1 hrơi pioh ngă bruă pơgang tơlơi rơnuk rơnua.

Nay Jek: Pơblang