VOV4.Jarai-Lơ 19/4, Khua Jơnum min mơnuih ƀôn sang tơring čar Dak Nông, ơi Nguyễn Đình Trung kĭ hră pơtrun kơtưn kơ bruă wai pơgang, ĕp lăng hăng pơđĭ kyar glai. Tui hăng anun, Gơnong bruă Ngă hmua hăng Pơđĭ kyar plơi pla, git gai Anom bruă tơhan pơgang glai ngă tui djơ̆ khut khăt tong ten bruă pơgang glai rưng hrơi hăng mlam, biă mă ñu amăng mông hrơi adai pơđiă kơtang, bơyan phang, mông pơdơi pơdă hrơi ngă yang prong; pơphun brơi ling tơhan, mă yua rơdêh gơnam mă bruă bong glăi hăng hơprah apui ƀong glăi tơdah hơmâo, tui hăng tơlơi pơhing lăi pơthâo hlâo, hyu tir, ĕp lăng kiăng tañ ƀuh apui ƀong glai.

Tơhan pơgang glai rưng kơtưn hyu sem lăng, pel ĕp tơlơi ngă soh mơ̆ng plơi pla, pơgăn hmao kru hăng pơsir truh kih ngă soh tơlơi phiăn pơgang glai rưng; pơphun ngă hrom tơhan djop sang bruă, pơgăn amăng jơlan mut nao rai amăng glai, hyu ĕp mă, dŏ pơ anih pơgang glai phun, anih hŭi hơmâo tơlơi truh apui ƀong glai.

Nay Jek: Pơblang