VOV4.Jarai - Lơ 9/4, Jơnum min mơnuih ƀon sang tơring čar Dak Nông pơphun jơnum hmư̆ tơlơi lăi pơthâo hăng pơčrông sai hơdră pơsir tơlơi tơnap, tơlơi dŏ gun amăng bruă arăng ngă pô bơwih kơ tuai hyu ngui ƀơi Tà Đùng (Dak Glong). Kual čuă ngui Tà Đùng lĕ anih anom  yôm amăng Đang ngui ngor čuă lăng lŏn pơtâo UNESCO Dak Nông. Ƀơi anai, hơmâo anih anom hiam, hơmâo lu mơnuih tuh pơ alin hăng hơmâo lu tuai lăp đing nao, mrô tuai nao ngui pơ anai jai hrơi lu tui. Hơdôm sang sĭ mơdrô ră anai ƀơi Tà Đùng lêng anet soh kah hăng brơi nao čuă, đih pơdơi, ƀong mơñum...Bruă brơi đih pơdơi lĕ arăng pơdong nưh, tông đơ anet, gơnam amăng lăm dŏ kơƀah mơn. Pơhiăp klah čun mông jơnum, ơi Nguyễn Đình Trung - Khua jơnum min mơnuih ƀon sang Dak Nông lăi, thun blan rơgao, Tà Đùng hmư̆ hing lĕ anih hyu ngui hiam. Khă hnun, bruă pơplih ming, wai lăng bruă  hyu ngui ƀơi anai aka ƀu pơhlôm ôh. Yua hnun, gong gai ƀơi anai kiăng pơtrut tui bruă wai lăng lŏn tơnah, akŏ pơdong hăng pơhlôm rơnuk rơnua.

Siu H’Mai: Pơblang