VOV4.Jarai - Lơ 21/4, Jơnum min ruah khua tơring čar Dak Nông pơphun jơnum tal 3 pơtŏng glăi bruă prăp pre kơ mông ruah khua pơ ala mơnuih ƀon sang dêh čar tal 15 hăng khua Jơnum min pơ ala mơnuih ƀon sang djŏp gưl rơwang thun 2021-2026. Tui hăng Jơnum min ruah khua tơring čar Dak Nông, truh ră anai hơdôm tơring glông hơmâo pok pơhai laih bruă ruah khua djơ̆ tơlơi phiăn. Jơnum min djŏp djuai ania mơnuih mơnam djŏp gưl hơmâo pơphun jơnum pơčrông sai bruă ruah khua tal 3, čih anăn mơnuih sit nik ba ruah. Kiăo tui tơlơi pơčrông sai, tar ƀar tơring čar hơmâo10 čô mơnuih dưi tơbiă anăn ba ruah ngă khua pơ ala mơnuih ƀon sang dêh čar tal 15 ; Khua jơnum min pơ ala mơnuih ƀon sang tơring čar hơmâo 88 čô; Khua jơnum min pơ ala mơnuih ƀon sang gưl tơring glông hơmâo 452 čô mơnuih tơbiă anăn ba ruah; gưl să hơmâo 2.960 čô mơnuih. 680 grup ruah khua ƀơi tơring čar hơmâo tĕp pơsir laih hră ƀing tơbiă anăn ba ruah ƀơi hơdôm anih plĕ hră, hăng mrô 410.659 čô mơnuih nao plĕ hră. Ƀơi mông jơnum, Jơnum min ruah khua tơring čar Dak Nông pơsit ƀing hơmâo anăn ba ruah ngă khua pơ ala mơnuih ƀon sang dêh čar tal 15 hăng khua jơnum min pơ ala mơnuih ƀon sang tơring čar rơwang thun 2021-2026 đah mơng ba nao pơ hơdôm anih ruah khua.

Anih  jơnum.

Siu H’Mai: Pơblang