VOV4.Jarai-Lơ 6/4, Jơnum min ruah khua tơring čar Dak Nông pơphun jơnum lăng nao rai amăng tivi, pơtô hrăm kơ bruă pơphun plĕ hră ruah khua pơ ala mơnuih ƀôn sang tal XV hăng ruah ƀing pơ ala mơnuih ƀôn sang djop gưl rơwang bruă mơ̆ng thun 2021-2026.

Thun blan rơgao, Ping gah, khua mua git gai bruă ruah khua tơring čar Dak Nông, Jơnum min pơ ala mơnuih ƀôn sang, Jơnum mơnuih ƀôn sang, Jơnum min djop djuai ania mơnuih mơnam Việt Nam hăng Jơnum mun ruah khua tơring čar gleng nao git gai, pơphun ngă tui bruă mă pơphun plĕ hră ruah khua.

Truh ră anai, tơring čar ngă giong laih bruă prăp lui ruah khua, pơgang bruă ngă djơ̆ tơlơi phiăn, ngă tui djơ̆ tơlơi pơtô mơ̆ng anom bruă gah dlông kiăng pok pơhai djơ̆ hăng tơlơi gêh găl amăng plơi pla.

Tơlơi tơnap tap dŏ gun gan hơmâo gơnong dlông pơtô brơi pơsir hĭ laih. Ơi Trần Xuân Hải, Kơ-iăng Khua Jơnum min mơnuih ƀôn sang tơring čar, Kơ-iăng khua jơnum min ruah khua tơring čar rơkâo ƀing khua mua nao jơnum lăi pơthâo hmao kru, kơ anom bruă ping gah, kơnuk kơna hăng pơtô brơi ƀing ngă bruă wai lăng bruă ruah khua djơ̆ tơlơi phiăn.

Nay Jek: Pơblang