VOV4.Jarai - Ƀơi anăp klin covid-19 glăk kơtang ƀơi dêh čar Kur, Ling tơhan pơgang guai tơring čar Dak Nông hăng tơhan apăn bruă pơtrut hyu tir, wai lăng jơlan guai, khut khăt ƀu brơi arăng mut nao rai ča čot amăng dêh čar ta, ngă ƀă hyu klin kheng.

Tơring čar Dak Nông hơmâo jơlan guai glông rơbêh 141km giăm tơring čar Mondulkiri (Kur), anih hơmâo mrô mơnuih ƀă klin Covid-19 amăng plơi pla. Đại tá Phan Quý Vỹ, Kơ-iăng khua apăn bruă čar Anom git gai tơhan pơgang guai tơring čar Dak Nông brơi thâo, ƀơi anăp tơlơi hŭi rơhyưt mơng klin Covid-19 ƀơi dêh čar Kur, ƀu pơgao lui ôh mơnuih Việt Nam mơng gah adih guai glăi pơ dêh čar ta bĕ klin. Yua hnun, Anom bruă git gai tơhan pơgang guai tơring čar kiăng khua mua, ling tơhan mơng 12 puih kơđông tơhan khut khăt ƀu dưi pơ-ai ôh, pơtrut hloh dong bruă hyu tir, wai lăng kơjăp ƀơi bah amăng jang, jơlan amur, jơlan pơtruh nao rai...

“Kiăng dưi pơgang glăi tañ klin klon, Ling tơhan pơgang guai hơmâo akŏ pơdong 25 anih dŏ gak ƀơi jơlan guai, ling tơhan pơgang guai hyu tir, krăp lăng na nao ƀơi hơdôm jơlan amur, jơlan pơtă nao, hơdôm kual phun amuñ hơmâo arăng găn nao rai. Ƀing gơmơi hơmâo ngă klă laih tơlơi pơtrun mơng ƀing khua, mơng Ding jum khul ling tơhan hăng Jơnum min mơnuih ƀon sang tơring čar kơ bruă pơgang klin Covid-19, ƀu brơi hơmâo mơnuih mơng rơngiao mut rai amăng dêh čar ta. Laih dong, gơmơi hyu pơtô pơblang klă, iâu pơthưr mơnuih ƀon sang ngă klă bruă pơgang klin hăng gum lăi pơhmư̆ tơdah ƀuh pô ngă soh, nao rai ča čot ƀơi jơlan guai, đuăi rai pơ dêh čar ta, đah mơng hmao pơsir hĭ”.

Khua mua tơring čar Dak Nông hyu lăng bruă pơgang klin Covid-19 ƀơi guai lŏn ia.

Hrŏm hăng djă bong hnong 100% mrô tơhan ƀơi hơdôm puih kơđông tơhan. Anom bruă git gai tơhan pơgang guai Dak Nông rơkâo Anom bruă git gai tơhan tơring čar ba nao ling tơhan mơng Đại đội bộ binh pơdong ƀơi jơlan guai djru pơgang, pơgăn klin. Laih dong kiăng hơdôm boh să pơ guai lŏn ia ba nao lu dong Grup tơhan mơnuih ƀon sang dŏ gak ƀơi hơdôm anih pơgang klin Covid-19.

Hrŏm hăng ling tơhan, anom bruă ia jrao Dak Nông ăt ba nao tơhan dŏ gak ƀơi hơdôm anih pơgang klin pơ guai lŏn ia, hăng tơlơi pơtrun “Pơgang klă, tañ ƀuh, tañ ba dŏ pơčlah, pơjrao klă, pơsir đut tơhnal, tañ ngă hơđong tơlơi hơdip”. Ơi Hà Văn Hùng - Kơ-iăng khua gơnong bruă ia jrao tơring čar Dak Nông brơi thâo dong, ră anai hơmâo 100 čô ơi ia jrao pơplih nao rai dŏ gak hrŏm hăng ƀing tơhan pơgang klin. Abih bang mơnuih nao rai pơ jơlan guai  lơ̆m hơmâo ƀuh anra hơmâo tơhan ba nao dŏ pơčlah tui tơlơi pơtrun.

“Tơring čar Dak Nông ră anai aka ƀu hơmâo pô ƀă klin lơi, samơ̆ ƀing gơmơi ƀu dưi pơ-ai ôh, hơdôm anom bruă ăt khŏm hyu tir na nao, pơgang klin klă. Anom bruă ia jrao ngă hrŏm hăng hơdôm gơnong bruă pok pơhai pơgang hĭ klin mut rai yua mơnuih mơng dêh čar Kur glăi. Ră anai, hơmâo năng ai ñu 200 čô mơnuih, wơ̆t ƀing ơi ia jrao hăng tơhan pơgang guai dŏ gak hrơi mlăm ƀơi hơdôm anih, ƀu brơi arăng mut rai amăng dêh čar ta ôh. Tơhan apăn bruă kĭ thuâ̆t, gơmơi iâu mơnuih mă bruă ƀơi hơdôm anih dŏ gak, pơhmutu, anih dŏ gak ƀơi tơring glông Čư Jut lĕ amra iâu mơnuih mă bruă ia jrao Čư̆ Jut, tơdah dŏ pơ tơring glông Dak Mil lĕ gơmơi iâu ƀing ơi ia jrao mơng Dak Mil, bơ ƀơi dua bah amăng jang lĕ gơmơi pơkiăo nao ling tơhan mơng Anom wai pơgang tơlơi duam ruă tơring čar glăi djru”.

Tơhan pơgang guai Dak Nông wai lăng klin ƀơi jơlan amur, jơlan pok  ƀơi guai dêh čar.

Hlâo kơ anun, tơring čar Dak Nông pơtrun hră git gai hơdôm gơnong bruă, khul, grup, tơhan blah ngă, hơdôm boh tơring glông ƀu dưi pơ-ai, anăm ngă amưng ôh amăng bruă pơgang, pơgăn klin; hơdư̆ hĭ bruă jơnum pơƀut lu mơnuih tơdah ƀu kiăng đơi. Laih dong khŏm ngă tui hơdră pơgang rơnuk rơnua, truă bơnal gôm ƀô̆, rao tơngan hăng ia čơƀu...tui tơlơi pơtô ba. Ling tơhan apăn bruă wai lăng kơjăp bruă arăng mut rai amăng dêh čar ta, brơi dŏ pơčlah, krăp hăng tơlơi suaih pral; laih dong prăp lui djŏp tơlơi kiăng đah mơng brơi arăng mut rai amăng dêh čar ta, kiăo tui klin kơtang hă tơdu, samơ̆ khŏm pơhlôm rơnuk rơnua mơn.

Tuấn Anh: Čih - Siu H’Mai: Pơblang