VOV4.Jarai - Dŏ kơnong rơbêh 2 wŏt hrơi tơjuh dong, hrơi abih bang mơnuih nao plĕ hră ruah Khua pơ ala mơnuih ƀon sang dêh čar tal XV hăng Khua khul pơ ala mơnuih ƀon sang djop gưl rơwang thun 2021-2026 amra pơphun. Ƀơi tơring čar Dak Nông bruă prap lui hrơi plĕ hră giong laih.

Tui hăng Jơnum min plĕ hră tơring čar Dak Nông, amăng rơwang thun 2021-2026 tơring čar Dak Nông hơmâo 10 čô mơnuih tơbiă anăn ruah ngă Khua pơ ala mơnuih ƀon sang dêh čar tal XV (amăng anun hơmâo 2 čô mơnuih gơnong glông tơbiă anăn) hơmâo pơpha, lăi pơthâo kơ bruă jak iâu plĕ hră ƀơi 2 anih pơphun plĕ hră. 88 čô mơnuih tơbiă anăn ruah khua khul pơ ala mơnuih ƀon sang tơring čar tal IV hơmâo pơpha, lăi pơthâo kiăng kơ jak iâu plĕ hră ƀơi 14 anih pơphun plĕ hră. Truh ră anai, tơring čar Dak Nông hơmâo giong laih bruă jŭ yap mrô mơnuih amra nao plĕ hră. Rơbêh kơ 410 rơbâo čô mơnuih amra nao plĕ hră, hăng tơlơi čang rơmang hluai tui hră plĕ amra ruah đĭ ƀing khua mua hơdip ba gru, thâo rơgơi mă bruă.

Siu Đoan: Pơblang