VOV4.Jarai - Ƀơi hơdôm bruă pơbưp kơplah wah mơnuih ruah khua hăng mơnuih tơbiă anăn kơ khua pơ ala Khul pơ ala mơnuih bôn sang hơdôm gưl ƀơi Daklak phrâo anai, lu mơnuih tơbiă anăn hmâo lăi pơdah jơlan hơdră bruă mă mơng pô abih pran jua. Biă ñu, ƀing tơbiă anăn lĕ đah kơmơi djuai ania ƀiă khă tal blung a gum hrom tơbiă anăn samơ̆ hmâo pơdŏng laih hơdôm jơlan hơdră bruă rơđah rơđông, djơ̆ bôh nik, dưi hmâo mơnuih ruah khua dŏng yua.

Pơđut mông bưp mơnuih ruah khua pơsur ruah khua, amai Vi Thị Kiều Chi (djuai ania Tày), pô tơbiă anăn kơ Khul pơ ala mơnuih ƀôn sang tơring čar Daklak rơwang bruă 2021-2026 hmâo čơkă mă lu tơlơi lăi glăi, gum pơhiăp ƀơi anăp mơng mơnuih ruah khua kiăng ƀơi anăp ngă giong bôh yôm jơlan hơdră mă bruă mơng pô. Hăng sa čô mơnuih tơbiă anăn hlăk ai hloh gum hrom ƀơi anom ruah khua mrô 1 (plơi prong Buôn Ma Thuột), amai Vi Thị Kiều Chi lăi pơthâo, kâo hmâo pơdŏng laih jơlan hơdră mă bruă pơkĕ hăng pơgang tơlơi dưi hăng bôh tŭ yua mơng khul mơnuih, hlăk ai tơdăm dra hăng tơdăm ngek dra muai čơđai muai. Amăng anun đing nao truh bruă kơtưn bơwih brơi kơ ƀing tơdăm ngek dra muai čơđai muai ƀơi kual asuĕk, ataih, kual tơnap tap hăng djuai ania ƀiă. Tui hăng amai Vi Thị Kiều Chi, tal blung a tơbiă anăn anun hleng hlong biă, samơ̆ ñu phing kơ pran jua mơn jơlan hơdră bruă mă mơ̆ pô pơdŏng hăng lăi pơthâo ƀơi anăp mơnuih ruah khual, sit nik hăng plơi pla.

“Amăng jơlan hơdră bruă mă lĕ drơi pô kâo lăi ha jăn hăng ăt lĕ khua pơa la kơ grŭp pơphun Khul hlăk ai anun kâo ăt pơdŏng mơn jơlan hơdră bruă mă kiăo tui djơ̆ bruă ngă tui hơdôm tơlơi dưi, bruă mă hăng pơgang bôh tŭ yua lăp djơ̆ kơ mơnuih amăng khul hlăk ai, tơdăm dra, tơdăm ngek dra muai, čơđai muai. Rơngiao kơ anun drơi pô kâo ăt lĕ sa čô đah kơmơi hăng thâo hluh bruă gơgrong mơng đah kơmơi, anun kâo ăt đing nao mơn amăng hơdôm tơlơi bơdjơ̆ nao bruă pơgang hăng bơwih brơi đah kơmơi hăng čơđai muai ƀơi plơi pla pơ̆ anăp anai”.

Tơring čar Daklak hmâo ngă giong laih hơdôm bruă bưp mơnuih ruah khua pơsur ruah khua mơng khua pơ ala Khul pơ ala mơnuih ƀôn sang hơdôm gưl

Bơ̆ hăng amai H’ Jai Hmok, djuai ania Êđê, tal blung a tơbiă anăn kơ khua pơ ala Khul pơ ala mơnuih ƀôn sang să Dray Bhăng, tơring glông Čư̆ Kuiñ, ñu hmâo pơdŏng laih jơlan hơdră mă bruă đing nao tum pơƀut adơi amai djuai ania ƀiă tui đăo. Amai H’ Jai brơi thâo ƀơi să, 92% mrô đah kơmơi amăng khul đah kơmơi djuai ania ƀiă hăng tui đăo. Khul đah kơmơi să hmâo pok pơhai laih lu bruă mă djru adơi amai pơđĭ kyar bơwih ƀong, pơđĭ tui prăk pơhrui glăi, gơnang kơ anun ngă pơhư̆č lu adơi amai gum hrom hăng khul, djru bruă pơđĭ kyar bơwih ƀong mơnuih mơnam, ngă hrŏ trun mrô sang anô̆ ƀun rin hrom mơng să dô̆ rơbêh kơ 5%. Tơdah dưi ruah ngă khua pơ ala Khul pơ ala mơnuih ƀôn sang să rơwang bruă pơ̆ anăp, hăng tơhnal pơkă pơđĭ tui anô̆ kơjăp hăng pơtrut kơtang hơdôm bruă bơkơtưn ƀơi să mơ̆ sa khul phun lĕ mơng adơi amai, amai H’ Jai amra pơdŏng hơdôm jơlan hơdră, bruă mă djơ̆ kiăng ngă pơhư̆č adơi amai gum hrom hơdôm bruă mă, djru đah kơmơi pơđĭ kyar bơwih ƀong hăng pơdŏng sang anô̆ dưm kơnar, yâu mơ-ak.

“Lu mơnuih ƀôn sang amăng să hơdip tui hơdră hơđong bưng pô hăng ƀu kiăng gum hrom mơnuih mơnam, gơñu hơdip ƀu pơhư hyu ôh, yua anun amăng jơlan hơdră mă bruă pơ̆ anăp, kâo amra mă bruă pơtrut pơsur. Blung a lĕ amra ba tơbiă jơlan gah, bôh yôm bruă mă hmâo tơlơi ngă pơhư̆č pioh gơñu gum hrom, kiăng gơñu ƀuh mơng jơlan hơdră bruă mă anun rơđah rơđông phrâo gơñu mưn ƀuh kơplah wah mơnuih mơnam hăng gah đăo hmâo tơlơi djơ̆ hrom hăng gơñu gum hrom mă bruă hăng pô”.

Hră čih anăn mơnuih tơbiă anăn dưi phuă laih kiăng mơnuih ƀôn sang dưi hơduah ĕp mă pô hăng ruah mă kiăng ruah ngă khua

Pô tơbiă anăn ƀơi lu anih anom lu djuai ania, lu biă ñu djuai ania ƀiă mơng pơngŏ dêh čar ta rai dô̆ pơ̆ anai, amai Hoàng Thị Huệ, djuai ania Nùng, mơnuih tơbiă anăn kơ Khul pơ ala mơnuih ƀôn sang să Ea Tam, tơring glông Krông Năng, tơring čar Daklak đing nao pha ra truh tơlơi pơgang bôh thâo đưm djuai ania pơkĕ hrom hăng pơđĭ kyar bơwih ƀong ƀơi plơi pla. Amăng jơlan hơdră mă bruă mơng pô, hrom hăng bruă gơgrong hrom gưl ping gah, gong gai plơi pla pơtrut pơsur mơnuih ƀôn sang, adơi amai amăng khul gum hrom pơdŏng plơi pla phrâo pơđĭ glông, hăng sa čô khua khul đah kơmơi să, amai Hoàng Thị Huệ đing nao ba bôh yôm ngă tui dưm kơnar bơnai hăng rơkơi, pơdŏng hơdră “5 ƀu hmâo, 3 agaih”, djru adơi amai pơplih phun pla, hlô rông hăng pơgang gru grua bôh thâo đưm mơng djop djuai ania kơ jơlan hơdră pơtrut pơsur ruah khua. Amai Hoàng Thị Huệ pơsit:

“Tơdah mơnuih ruah khua ruah ƀing gơmơi mut amăng khul pơ ala mơnuih ƀôn sang să pơ̆ anăp thơ drơi pô kâo amra gir run ngă tui hơdôm mơta dưi ngă amăng hơdôm hrơi rơgao, tŭ mă hơdôm Tơlơi pơtrun pơsit mơng gưl dlông ăt kah hăng hơdôm jơlan hơdră pơkă mơng gưl dlông kiăng pok pơhai truh neh wa mơnuih ƀôn sang”.

Rơwang bruă 2021-2026, tơring čar Daklak amra ruah khua kiăng ruah mă 75 čô khua pơ ala Khul pơ ala mơnuih ƀôn sang gưl tơring čar, 514 čô khua pơ ala Khul pơ ala mơnuih ƀôn sang gưl tơring glông hăng 4.667 čô khua pơ ala Khul pơ ala mơnuih ƀôn sang gưl să. Amăng anun pơhlôm tui djơ̆ pran jua Tơlơi pơtrun pơsit 1187 mơng Jơnum apăn bruă Khua pơ ala mơnuih ƀôn sang dêh čar ta lĕ, hmâo ƀiă biă mă ñu 35% mrô mơnuih tơbiă anăn lĕ đah kơmơi, hrưn đĭ mrô đah kơmơi dưi ruah hmâo năng ai ñu 30%. Truh mông anai, abih bang hơdôm bôh anom ruah khua hmâo ngă giong laih bruă bưp mơnuih ƀôn sang pơsur ruah khua tui djơ̆ tơlơi pơkă. Hră čih anăn hăng tơlơi hơdip bruă mă mơng mơnuih tơbiă anăn ăt dưi lăi pơthâo phuă hĭ mơn ƀơi hơdôm anih anom ruah khua kiăng mơnuih ƀôn sang dưi hơduah ĕp rơđah.

Hăng hơdôm jơlan hơdră bruă mă dưi hmâo ƀing tơbiă anăn lăi pơdah amăng hơdôm bruă bưp mơnuih ruah khua pơsur ruah khua phrâo rơgao, amra djru mơnuih ƀôn sang thâo rơđah hloh kơ kơčăo bruă mă mơng mơnuih tơbiă anăn lom dưi ruah ngă khua pơ ala Khul pơ ala mơnuih ƀôn sang rơwang bruă pơ̆ anăp, mơng anun hmâo gru jơlan ruah mă ƀing khua pơ ala sit nik abih pran jua, djop pran jua klă bôh thâo amăng bruă ruah khua pơphun amăng lơ 23/5 pơ̆ anăp anai./.

H’ Xíu Hmôk: Pô čih – Siu H’ Prăk: Pô pơblang