VOV4.Jarai - Pioh hơdor glăi 65 thun hrơi akŏ pơjing Khul pơlir hơbit hlăk ai Việt Nam (15/10), Khul pơlir hơbit hlăk ai Việt Nam tơring čar Daklak hơmâo pơphun tal pơplông kiăng pơlir hăng hơdôm boh tơhnal bruă mă tong ten, lăp djơ̆ hăng tơlơi sit nik hăng amăng hrơi blan hơmâo klin. Hăng gưl tơring čar, jơlan hơdră “Bruă kâo khăp kơ lŏn ia” hơmâo jao 10 boh sang gum pơgôp, 9 boh tơdrŏn pah boh lông, 3 ring bruă ngă hiam dua gah jơlan, pla rơbêh 25.000 phun kyâo.

Hlăk ai Daklak jao hơdôm pluh rơbâo anung gơnam djru

Hrŏm hăng anun, Khul tơring čar ăt jao 100 klăk prăk rơnoh prăk pơphun mă bruă brơi hlăk ai, jao rơbêh 28.000 anung gơnam hăng ia jrao mơng jơlan hơdră “Hơdôm klăk kơdong djru mơnuih mơnam” yua kơ Khul hlăk ai pơphun. Djop gưl khul grup ăt hơmâo lu bruă mă, pơplih bruă pơphun ƀơi anăp hơdai nao lăng nao rai mơng ataih anun lĕ: Ngui adôh suang hăng tơlơi Angle, jơnum pơphun bruă bơwih ƀong sĭ mơdrô thâo pơčeh phrâo brơi hlăk ai, jơlan hơdră “Hơdôm yak tơkai djru mơnuih mơnam” hăng “Rĭm čô hlăk ai sa hơdrôm hră pơđok”….

Siu Đoan: Pơblang