VOV4.Jarai - Mơguah lơ 8/4, Khua Jơnum min mơnuih ƀôn sang tơring čar Daklak Phạm Ngọc Nghị git gai bruă jơnum kiăng pel ĕp, pơsir sa dua bôh yôm bơdjơ̆ nao amăng bruă ngă tui hră pơ-ar tuh pơplai ƀơi tơring čar.

Anih anom jơnum

Amăng mông jơnum, pô tuh pơplai, mơnuih pơ ala hơdôm gơnong bruă, anom bruă hmâo lăi pơthâo, lăi pơthâo glăi hơdôm tơlơi tơnap, tơlơi gun amăng bruă pơsir sa dua bôh yôm bơdjơ̆ nao amăng bruă ngă tui ngă pơ-ar tuh pơplai hơdôm rơwang bruă ƀơi tơring čar, anun lĕ: Akô̆ bruă pơkă kual Ƀut tuai čuă ngui, anih anom ngui ngor hăng tơdron golf Dơnao Ea Nhái; rơkâo Rơwang bruă phun Logistic kual Dăp Kơdư mơng Phun akha Sang bruă Dăng kông Viettel. Pơhiăp klah čun bruă jơnum, Khua Jơnum min mơnuih ƀôn sang tơring čar Daklak Phạm Ngọc Nghị lăi pơthâo hơdôm tơlơi tơnap, tơlơi gun hăng ƀing tuh pơplai. Hrom hăng anun jao kơ hơdôm gơnong bruă, anom bruă, plơi pla gum hrom hăng hơdôm bôh anom bruă bơdjơ̆ nao pel ĕp glăi kual pơkă, ruah mă, ngă giong hơdôm tơlơi lăi pơthâo glăi, pơphô brơi hơdôm hră pơ-ar kiăng hloh tui tơlơi pơkă, tañ lăi pơthâo kơ Jơnum min mơnuih ƀôn sang tơring čar pel ĕp pơtlaih tơlơi gun kiăng pơhlôm hơdôm rơwang bruă dưi pok pơhai ba glăi bôh tơhnal, djru pơđĭ kyar bơwih ƀong – mơnuih mơnam mơng tơring čar./.

Siu H’ Prăk: Pô pơblang