VOV4.Jarai - Amăng Blan hlăk ai thun anai, hlăk ai tơring čar Daklak hmâo ngă tui 710 ring bruă, črăn bruă hluai tui lu jơlan hơdră, bruă mă tŭ yua. Anai le mrô dưi ba tơbiă amăng mông ngă Lơphet Blan Hlăk ai thun 2021 yua kơ Khul hlăk ai tơring čar Daklak pơphun čơtlăm lơ 15/4.

Apah bơni kơ hơdôm grŭp hăng mơnuih mă bruă rơgơi 

Bruă mă thâo hloh kah hăng pơphun 346 mông lăi pơhing hăng bruă pơgang anih anom dô̆, pơgang pơgăn mơng djah djâu kơ su, bŏng glăi tơlơi pơplih ayuh hyiăng, ngă rơbêh kơ 20.700 čô mơnuih hlăk ai gum hrom. Hơdôm gưl khul hlăk ai pơkra glăi rơbêh kơ 25 km jơlan amăng plơi pla; ngă tui rơbêh kơ 20 km glông hrĕ pơkĕ apui pơčrang rơđah ƀơi jơlan amăng plơi pla; pơphun 10 tal brơi drah gum djru, mơng anun iâu pơhrui hmâo giăm truh 3000 anung drah. Hơdôm bruă mă djru hlăk ai pơphun bruă, pơđĭ kyar bơwih ƀong dưi đing nao pok pơhai hăng lu bruă mă kah hăng pơphun gum hrom pơhrăm hơdôm hơdră, lăi pơthâo tơlơi pơhing kơ bôh thâo pơphun bruă, pơdŏng bruă; pơtô brơi, lăi pơthâo kơ hlăk ai pơdŏng akô̆ bruă hăng ngă juăt hăng ngăn rơnoh kiăng pơphun bruă./.

Siu H’ Prăk: Pô pơblang