VOV4.Jarai - Ƀơi anăp tơlơi klin ruă ngă dlêh tơnap, Jơnum min mơnuih ƀôn sang tơring čar Daklak hmâo mă yua laih hră pơ-ar kơ bruă pok pơhai hơdôm bruă pơgang pơgăn klin ƀơi tơring čar hmâo čih pioh mơnuih ƀă Covid-19.

Kiăo tui anun, tơring čar Daklak črâo ba Khua Jơnum min mơnuih ƀôn sang gưl tơring glông, gưl să gơgrong hlâo gum hrom hăng hơdôm bôh anom hmâo bơdjơ̆ nao črâo ba mă yua hơdôm bruă ngă hơdư̆ hĭ kiăng pơgang, pơgăn klin ƀơi tơring čar mơng 12 mông mlăm lơ 10/5/2021 truh kơ hrơi hmâo tơlơi lăi pơthâo phrâo. Rơđah biă ñu, pơdơi hơdôm bruă tum pơƀut lu mơnuih, hơdôm bruă jơnum lu rơbêh kơ 30 čô mơnuih amăng sa anih, hơdư̆ hĭ bruă tum pơƀut lu mơnuih ƀơi anih anom mă bruă, sang hră, sang ia jrao; pơdơi abih hơdôm bruă hmâo tum pơƀut lu rơbêh kơ 30 čô mơnuih ƀơi hơdôm anih anom jơnum khul đăo; ngă tui tơpă bruă gôm adung mơbah, pơdjai kơman, ngă tui tơpă tơlơi rơkâo ngă tui 5 mơta tơlơi pơgang klin mơng Ding jum ia jrao./.

Siu H’ Prăk: Pô pơblang