VOV4.Jarai - Mơguah lơ 30/3, ƀơi plơi prong Buôn Ma Thuột, gơnong bruă pôr pơhing tơring čar Daklak hơmâo pơphun mông pơtô hrăm kơ bruă lăi pơthâo kơ tal plĕ hră ruah Khua pơ ala mơnuih ƀon sang dêh čar tal XV hăng khua khul pơ ala mơnuih ƀon sang djop gưl rơwang thun 2021-2026. Rơbêh 130 čô mơnuih nao hrăm lĕ ƀing Khua mua, ƀing mă tơlơi pơhing, ƀing dăp hơdră mơng anom bruă pôr pơhing amăng tơring čar hăng ƀing mă tơlơi pơhing phrâo Kơnuk kơna anom bruă pơdong ƀơi Daklak nao hrăm hrŏm.

Gơnong bruă pơphun bruă tơring čar Daklak brơi thâo, bruă pôr pơhing lĕ yôm phăn biă mă kiăng kơ tal plĕ hră ruah Khua pơ ala mơnuih ƀon sang dêh čar tal XV hăng Khua khul pơ ala mơnuih ƀon sang djop gưl rơwang thun 2021-2026 dưi pơphun hiam klă. Bruă pôr pơhing ngă kơ Ping gah, khul ling tơhan hăng abih bang mơnuih ƀon sang thâo rơđah kơ tơlơi yôm mơng tal plĕ hră anai lĕ kiăng kơ ruah ƀing khua mua thâo rơgơi, pơ ala brơi tơlơi gơgrong, čang rơmang hăng tơlơi dưi mơng mơnuih ƀon sang.

Siu Đoan: Pơblang