VOV4.Jarai - Jơnum min mơnuih ƀôn sang tơring čar Daklak pơphun Jơnum klah čun bruă mă thun 2020, pok pơhai bruă mă thun 2021 mơng Grŭp črâo bruă pơgang pơgăn ƀing ngă soh, tơlơi črih čruai mơnuih mơnam hăng pơdŏng bruă Abih bang mơnuih ƀôn sang pơgang tơlơi rơnuk rơnua Lŏn ia tơring čar. Tui hăng tơlơi lăi pơthâo glăi amăng mông jơnum, thun 2020, tơlơi rơnuk rơnua kơđi čar ƀơi tơring čar dưi djă pioh kơjăp dong. Ƀing ngă soh hăng tơlơi hơđong mơnuih mơnam dưi pơhrŏ trun dong; mơnuih ngă soh gah hot jrao dưi thâo lu hloh; tơlơi truh ƀơi jơlan nao rai hrŏ trun wot 3 tơnhal pơkă. Amăng mông jơnum, Jơnum min mơnuih ƀôn sang tơring čar rơkâo pơ̆ anăp anai, hơdôm bôh ƀirô, anom bruă, plơi pla pok pơhai ngă tui tơpă dong, ba glăi bôh tơhnal hơdôm tơlơi črâo ba, tơlơi pơtrun pơsit mơng Ping gah, kơčăo bruă mơng tơring čar kơ bruă pơgang pơgăn ƀing ngă soh, pơgang pơgăn hot jrao, pơdŏng bruă Abih bang mơnuih ƀôn sang pơgang rơnuk rơnua Lŏn ia; đing nao črâo ba, pok pơhai hơdôm bruă mă, pơgang khut khăt tơlơi rơnuk rơnua, pơhlôm hơđong amăng bruă ruah khua pơ ala mơnuih ƀôn sang dêh čar ta tal 15 hăng khua pơ ala Jơnum min pơ ala mơnuih ƀôn sang hơdôm gưl rơwang bruă 2021-2026./.

Siu H’ Prăk: Pô pơblang