VOV4.Jarai - Jơnum min ruah khua tơring čar Daknông hmâo laih hră lăi pơthâo mrô 69 mơ-ĭt kơ Khul wai lăng bruă ruah khua lŏn ia ta kơ bruă rơkâo pơphun ruah khua pơ ala mơnuih ƀôn sang tal 15 hăng khua pơ ala Jơnum min pơ ala mơnuih ƀôn sang hơdôm gưl rơwang bruă 2021-2026 tañ sa hrơi bơhmu hăng tơlơi pơkă ƀơi sa dua anom pơgang guai lŏn ia. Tui hăng Jơnum min ruah khua tơring čar Daknông, hơdôm hrơi rơgao ƀơi glông guai lŏn ia Việt Nam hăng Kur hmâo lu tơlơi glêh tơnap him lăng tơlơi klin Covid-19. Ră anai mơnuih apăn bruă tơhan, ling tơhan pơgang guai tơring čar Daknông glăk đing nao ngă tui bruă 2 mơta pơkĕ hrom, pơgang rah guai dêh čar hăng pơgang rah klin Covid-19. Hluai tui Mơta tơlơi 72, Phiăn Ruah khua pơ ala mơnuih ƀôn sang dêh čar ta hăng Khua pơ ala Jơnum min pơ ala mơnuih ƀôn sang, kiăng pơgang kơjăp pô guai lŏn ia rơnuk rơnua hăng pơgang pơgăn klin Covid-19, Jơnum min ruah khua tơring čar Daknông rơkâo Khul wai lăng bruă ruah khua lŏn ia ta brơi ruah khua tañ hloh sa hrơi ƀơi 12 bôh puih kơđông pơgang guai lŏn ia hăng Tiểu đoàn pơhrăm bruă pơgang 19 (Ƀirô git gai ling tơhan pơgang guai lŏn ia tơring čar”./.

Siu H’ Prăk: Pô pơblang