VOV4.Jarai - Phrâo tôm adih anai, Gơnong bruă apui lơtrik tơring čar Daknông pơsir tañ laih 2 mơta tơlơi truh ƀơi glông hrĕ apui lơtrik, pơhlôm apui yua kơ djop mơnuih. Rơđah biă ñu, amăng yang hrơi dŏng lơ 10/5, sa tal kuar yâu ngă pok đuăi bơbung sang mơnuih ƀôn sang hăng ngă jôh phun kyâu djơ̆ ƀơi hrĕ apui, ngă djai apui ƀơi să Nhân Đạo, tơring glông Dak R’lấp.

Hmư̆ hing giong, mơnuih mă bruă gah anom bruă apui lơtrik Dak R'lấp hmâo ba nao laih rơdêh hrom hăng măi mok pioh pơsir pơkra glăi, pơkĕ glăi apui kơ mơnuih ƀôn sang lom 3 mông čơtlăm hrơi anun mơn. Hlâo kơ anun, lom 10 mông lơ 4/5, ƀơi jơlan nao rai amăng tơring glông Dak Song – Tuy Đức, sa bôh rơdêh pơgiăng gơnam tam yua kơ pơgiăng rơgao hơnong tuač djơ̆ hrĕ apui ngă kloh hĭ hrĕ apui, jôh gŏng apui hăng ngă đing anom pơkĕ apui T70. Tơlơi truh ngă laih bruă pơkĕ hyu apui brơi rơbêh kơ 5.200 čô mơnuih mă yua apui bơdjơ̆ nao. Yua anun, Anom bruă apui lơtrik Dak Song khom đing nao iâu abih bang mơnuih mă bruă, rơdêh, măi mok pioh tañ pơplih pơkra. Truh sa mông čơtlăm hrơi anun mơn, mơnuih mă bruă mơng anom bruă apui lơtrik hmâo pơsir giong anô̆ răm rai hăng tañ pơkĕ glăi apui yua./.

Siu H’ Prăk: Pô pơblang