VOV4.Jarai - Ƀơi anăp tơlơi tơnap him lăng mơng klin Covid-19, gong gai plơi pla hăng hơdôm bôh ƀirô apăn bruă hơdôm bôh tơring čar amăng kual Dăp Kơdư hmâo kơtưn bruă pơgang pơgăn. Hrom hăng bruă dô̆ gak wai mơnuih mut tơbiă ƀu djơ̆ phiăn mơng guai lŏn ia, čơlah đuăi sa dua čô mơnuih bơdjơ̆ nao pô ƀă kơman Covid-19, gơnong bruă ia jrao, pơtô pơhrăm ăt pok pơhai mơn hơdôm bruă mă kiăng pơgang hlôm hlâo klă hloh tơlơi lar hyu mơng klin ruă.

Ƀơi tơring čar Kontum, ling tơhan pơgang guai lŏn ia hmâo kơtưn đĭ dong khul mơnuih kiăng pơgang pơgăn hơdôm mơnuih găn rơgao guai lŏn ia ƀu djơ̆ phiăn ƀơi dua glông jơlan guai lŏn ia Lao hăng Kur. Rơđah biă ñu, giăm hmâo 100 čô khua tơhan, tơhan plơi juăt bruă dưi iâu nao mă bruă kơ 8 bôh Puih kơđông pơgang guai lŏn ia mơng tơring čar Kontum. Đại tá Lê Minh Chính, mă bruă ƀơi Puih kơđông pơgang guai lŏn ia tơring čar Kontum brơi thâo, hrom hăng bruă dưi kơtưn dong mơnuih mă bruă, mơnuih apăn bruă tơhan, ling tơhan ƀơi glông guai lŏn ia ataih rơbêh kơ 292km giăm hăng dêh čar Lao hăng Kur ăt dưi čơkă mă na nao mơn tơlơi lăng ba, pơtrut pơsur wot pran jua hăng gơnam tam lom ngă tui bruă wai lăng pơgang guai lŏn ia hăng pơgang klin Covid-19:

“Rơngiao kơ hơdră gum djru, hơdră bruă mơng Ping gah, Kơnuk kơna, Khul ling tơhan lăng ba lĕ Ping gah, Jơnum min mơnuih ƀôn sang tơring čar ăt kah hăng hơdôm bôh ƀirô hmâo nao čuă, pơtrut pơsur kơ adơi ayong hơdôm gơnam mă yua gah ia jrao, hơdôm măi mok gơnam tam kơ ia yua, apui lơtrik pơkĕ hăng pơ-iă yang hrơi pioh djru sa črăn djru kơ adơi ayong hơđong pran jua dô̆ gơgrong ƀơi guai lŏn ia. Ƀing gơmơi ăt ngă tui klă mơn jơlan gah 4 mơta hơđăp ƀơi anai. Ƀơi hơdôm anih anom hmâo ia rô mă pô lĕ adơi ayong kơtưn đĭ bruă bơwih ƀong čem rông hlô mơnong pioh pơđĭ tui gơnam ƀong huă rim hrơi kơ ling tơhan hăng djă pioh hơdôm hơdră gum djru kah hăng Puih kơđông pioh adơi ayong hmâo tơlơi suaih pral kơjăp kiăng ngă klă bruă pơgang klin hăng bơwih ƀong huă”.

Khul pơgang guai lŏn ia lăi pơhing pơgang pơgăn klin Covid-19

Ƀơi anăp tơlơi ngă dleh tơnap mơng klin ruă, Jơnum min mơnuih ƀôn sang tơring čar Daklak hmâo črâo ba Khua Jơnum min mơnuih ƀôn sang gưl tơring glông, gưl să gơgrong hlâo gum hrom hăng hơdôm bôh anom bruă bơdjơ̆ nao črâo ba mă yua hơdră ngă hơdư̆ kiăng pơgang, pơgăn klin ƀơi tơring čar mơng 12 mông mlăm lơ 10/5/2021 truh kơ hmâo tơlơi lăi pơthâo phrâo. Rơđah biă ñu, pơdơi hơdôm bruă jơnum, hơdôm tơlơi tum pơƀut lu rơbêh kơ 30 čô mơnuih amăng sa anih (kơnong kơ hơdôm bruă jơnum bưp mơnuih ƀôn sang ngă tui tơlơi pơkă mơng Jơnum min ruah khua tơring čar”; hơdư̆ bruă tum pơƀut lu mơnuih amăng rơwang anih mă bruă, sang hră, sang ia jrao; pơdơi abih hơdôm bruă tum pơƀut lu rơbêh kơ 30 čô mơnuih ƀơi hơdôm anih anom pơƀut jơnum khul đăo; pơdơi abih bang hơdôm bruă mă bôh thâo, bơkơjăp drơi jăn ƀơi hơdôm anih anom lu mơnuih jưh; pơdơi pơphun hăng hơdôm bruă pơdô̆ rơkơi bơnai, jơnum ngui, ƀŏng huă sang phrâo... hăng tơlơi pioh atâo rơkâo mơnuih ƀôn sang pơphun hăng ngă mă ƀiă, hơdư̆ tum pơƀut hăng ngă tui tơpă bruă gôm adung mơbah, pơdjai kơman.

Truh mông anai, Daklak hmâo laih 2 čô mơnuih ƀă kơman Sasr-CoV-2, dô̆ hrom sa bôh sang ƀơi plơi prong Buôn Ma Thuột. Kual plơi prong hmâo 2 čô mơnuih ƀă kơman anai dưi guang dar laih. Sa bôh sang hră wai lăng pơtô čơđai anet, anih hmâo čơđai F1, dô̆ hrom sang hăng 2 čô mơnuih ƀă kơman klin, ăt hmâo krư̆ laih bah amăng pioh pơphun pơdjai kơman. Yua hmâo sa čô čơđai anet lĕ F1 mơng pô ruă 3237, Jơnum min mơnuih ƀôn sang tơring čar Daklak hmâo pơsit kơ hơdôm sang hră wai lăng pơtô čơđai anet ƀơi plơi prong Buôn Ma Thuột pơdơi sa rơwang hrơi tơjuh, kiăng pok pơhai hơdôm bruă pơgang, pơgăn klin. Bơdjơ̆ nao ƀing čơđai dô̆ amăng kual guang dar, ơi Đoàn Ngọc Thượng, Kơ-iăng Khua Jơnum min mơnuih ƀôn sang plơi prong Buôn Ma Thuột brơi thâo:

“Hăng mơnuih mơng ƀing čơđai ră anai glăk prăp lui tal pơplông abih thun hrăm 2020-2021 lĕ ƀing gơmơi hmâo črâo ba laih khul apăn bruă pel ĕp amăng kual čơlah đuăi kiăng hmâo anăn rơđah rơđông. Tơdơi kơ hmâo hră čih anăn rơđah rơđông lĕ, ƀing gơmơi brơi pơplông pơhrua nao tơdah ƀing čơđai ƀu hmâo pơplông hrom mơng tal pơplông abih thun hrăm 2020-2021”.

Kual čơlah đuăi ƀơi tơring čar Daklak

Mơguah lơ 10/5, Anom wai lăng tơlơi duam ruă tơring čar Daklak brơi thâo hmâo laih bôh tơhnal pơčrang lăng tal 1 hơdôm mơnuih dô̆ ƀơi kual hmâo arăng guang dar bơdjơ̆ nao pô ruă 3237 hăng 3334. Kiăo tui anun, abih bang hơdôm mơnuih amăng kual guang dar ƀơi jơlan ñep 189/1 Mai Hắc Đế, phường Tân Thành, (plơi prong Buôn Ma Thuột, tơring čar Daklak) hmâo 144 čô mơnuih leng kơ hmâo bôh tơhnal pơčrang lăng tal 1 ƀu ƀuh ƀă kơman Sars-CoV-2.

Rơwang hrơi tơjuh rơgao, Jơnum min mơnuih ƀôn sang hơdôm bôh tơring čar Daknông, Lâm Đồng, Kontum hmâo laih hră pơ-ar rơkâo kơ bruă pơdơi jăng jai bruă mă sa dua mơta kiăng ngă tui tơpă hơdôm bruă pơgang, pơgăn klin Covid-19. Kiăo tui anun, sa dua mơta bruă mă ƀu sit nik kiăng đơi kah hăng anih sĭ mlia tơpai mơñum, karaoke, anih adôh suang, anih ngui điện tử amra lar tưp prong klin Covid-19 ƀơi tơring čar khom pơdơi jăng jai abih bruă mă. Grŭp črâo ba bruă pơgang, pơgăn klin ƀơi ană mơnuih mơng tơring čar Daknông rơkâo hơdôm khul grŭp gơgrong bruă pơgang hăng ƀirô juăt bruă gum hrom kơtưn lăng tui klin ruă ƀơi hơdôm kual bah amăng guai lŏn ia, kual guai lŏn ia. Ƀirô apăn bruă kơtưn pel ĕp, lăng tui bruă gôm adung mơbah, dô̆ čơlah ƀơi hơdôm anih hmâo lu mơnuih jưh, biă ñu ƀơi hơdôm kual, anih anom tuai čuă ngui; phak tơhmal tơpă hơdôm mơnuih ngă soh tơlơi phiăn pơkă.

Mơnuih ƀôn sang tơring čar Daknông lăi pơthâo tơlơi suaih pral 

Ăt măng rơwang hrơi tơjuh rơgao mơn, ƀơi kual Dăp Kơdư hmâo sa dua čô mơnuih khom dô̆ čơlah yua bơdjơ̆ nao pô ruă Covid-19. Rơđah biă ñu, Anom ia jrao tơring glông hmâo ngă tui laih bruă čơlah đuăi 1 čô mơnuih F1 hăng pô ƀă kơman Covid-19 ƀơi tơring čar Vĩnh Phúc hăng glăk pơphun tañ bruă hyu hơduah ĕp mơnuih bơdjơ̆ nao pô ƀă kơman klin. Hmâo 6 čô mơnuih giăm hăng F1 ƀơi tơring glông Sa Thầy ăt dưi dô̆ čơlah mơn kiăng lăng tui. Bơ̆ ƀơi Daklak, rơwang hrơi tơjuh rơgao, Anom ia jrao tơring kual Ea Pôk, tơring glông Čư̆ Mgar hmâo tŭ mă sa čô mơnuih nao lăi pơthâo tơlơi suaih pral pơwot glăi mơng ƀôn prong Đà Nẵng. Pô anai hmâo gru nam ruă klin hăng brơi ƀuh mơng tơlơi ruă ƀă kơman Covid-19 kah hăng pơtuk, pơ-iă drơi jăn, ƀlĕ ia adung... Tơdơi kơ hmư̆ hing mơtăm, pô anai dưi mă ia khak ia adung mơ-ĭt kơ Anom kơsem min klin ruă Dap Kơdư kiăng pơčrang lăng hăng glăk dô̆ tơguan bôh tơhnal pơčrang lăng. Ră anai pô anai dưi nao pơ̆ anih dô̆ čơlah ƀơi Anom pơjrao tơlơi ruă tưp mơng Anom ia jrao tơring glông Čư̆ Mgar./.

Siu H’ Prăk: Pô pơblang