VOV4.Jarai - Mơguah lơ 9/4/2021, ƀơi Sang bruă Ping gah dêh čar, Ding jum kơđi čar hơmâo jơnum yŭ tơlơi git gai mơng ơi Nguyễn Phú Trọng, Khua git gai Ping gah bơkơtuai kơ hơdôm tơlơi hăng boh than ba glăi mơng bruă git gai, črâo bruă 3 blan tal 1 thun 2021 hăng sa, dua bruă pơ anăp. Ding jum kơđi čar pơsit, Khul khua apăn bruă Ping gah, Ding jum kơđi čar, Grup khua git gai Ping gah, Khua pơ ala mơnuih ƀon sang dêh čar, Khua mir sir, Kơnuk kơna, djŏp gưl, anom bruă hơmâo git gai črâo bruă tŭ yua, pơphun truh kih Jơnum Ping gah tal 13 hăng ngă giong bruă yôm akŏ pơjing Ping gah hăng anom bruă čar, pơđĭ kyar bơwih ƀong huă - mơnuih mơnam, ling tơhan, rơnuk rơnua, pơtom hiăp. Amăng hrơi blan pơ anăp anai, djŏp gưl, anom bruă kiăng pơtrut tui hơdôm tơlơi dưi ngă, pơsir hĭ tơlơi dŏ tơdu, tơlơi tơnap hăng lông lăng; git gai ngă tui tơlơi pơtrun jơnum Ping gah dêh čar tal 13 hăng gir ngă giong djŏp bruă hơmâo jao amăng thun 2021. Amăng anun, kiăng pơƀut git gai truh kih jơnum ruah khua pơ ala mơnuih ƀon sang dêh čar tal 15 hăng Jơnum min khua pơ ala mơnuih ƀon sang djŏp gưl rơwang thun 2021-2026.

Siu H’Mai: Pơblang