VOV4.Jarai - Ơi Lê Văn Thanh, Kơ-iăng khua Ding jum Mơnuih mă bruă - Tơhan rơka hăng Mơnuih mơnam phrâo hơmâo mông ngă bruă hăng Jơnum min mơnuih ƀon sang tơring čar dak Lak kơ bruă hơduah tơña, sem lăng bruă ngă tui hơdră djru pơhrŏ trun tơlơi rin ƀun, bruă mă ƀơi Dak Lak. Rơwang thun 2021-2026 Dak Lak hơmâo mă yua 900 klai prăk pioh ngă Jơlan hơdră dêh čar pơtrun pơhrŏ trun mrô sang anŏ rin hơđong kơjăp. Tơlơi anai djru kơ Dak Lak dưi man pơkra anih anom, djru pơđĭ kyar bơwih ƀong huă, pok prong hơbô̆ bruă pơhrŏ trun mrô rin ƀun, djru brơi prăk čan pioh bơwih ƀong, djru bruă hrăm hră, ia jrao, ngă agaih anih anom, sang dŏ...Amăng 5 thun rơgao, giăm 252 rơbâo boh sang anŏ hăng ƀing hơmâo anăn kơnuk kơna djru dưi čan prăk hăng mrô prăk giăm 7 rơbâo klai. Ơi Lê Văn Thanh, Kơ-iăng khua ding jum Mơnuih mă bruă Tơhan rơka hăng Mơnuih mơnam bơni biă kơ tơlơi gir pơhrŏ trun sang anŏ rin hăng pơsir brơi bruă kơ mơnuih mơnam ƀơi Dak Lak, khă hnun, kiăng pơhrŏ trun mrô sang anŏ rin hơđong kơjăp, Dak Lak kiăng hơmâo hơdră bruă rơđah rơđông, khŏm brơi ƀing ngă khua yơh gơgrong bruă hlâo. Laih dong kiăng pok pơhai lu hơbô̆ bruă djru mơnuih ƀon sang ngă hmua pla pơjing, bơwih ƀong, pơtŏng glăi mrô mơnuih mă bruă đah mơng hơmâo hơdră pơtô bruă mă, djru hơduah ĕp bruă mă lăp djơ̆.

Mông jơnum.

Siu H’Mai: Pơblang