VOV4.Jarai-Jơnum min djop djuai ania mơnuih mơnam Việt Nam tơring čar Gia Lai phrâo jơnum pơčrông sai tal 3 čih anăn phuă lui hơdôm ƀing djop tơlơi gêh gal, pioh tơbiă anăn brơi ruah ngă pô pơ ala mơnuih ƀôn sang dêh čar tal XV, ƀing pơ ala mơnuih ƀôn sang djop gưl mơ̆ng thun 2021-2026.

Mông jơnum abih bang

Ƀơi mông jơnum, tơdơi kơ pơčrông sai abih bang tŭ ư čih anăn 10 čô lăi pơthâo pioh ruah ngă pô pơ ala mơnuih ƀôn sang dêh čar tal XV. Pơkă hăng jơnum pơčrông sai tal dua, jơnum anai hơmâo 3 cô rơkâo lom hĭ anăn ƀu tơbiă anăn dơ̆ng tah, pioh ruah ngă pô pơ ala mơnuih ƀôn sang dêh čar tal XV. Jơnum pơčrông sai tal 3, phuă hĭ anăn 119 čô mơnuih tơbiă anăn pioh ruah ngă pô pơ ala mơnuih ƀôn sang tơring čar Gia Lai tal XII, rơwang bruă thun 2021-2026.

Tơdơi kơ jơnum pơčrông sai tal 3, Jơnum min ruah khua tơring čar Gia Lai phuă hĭ anăn 14 cô tơbiă anăn pioh ruah ngă khua pơ ala mơnuih ƀôn sang dêh čar tal XV amăng anun, mơ̆ng gơnong glông lăi pơthâo 4 cô, tơring čar lăi pơthâo 10 cô. Pơphun 21 grup ruah khua, kiăng ruah mă 71 čô amăng 119 čô mơnuih tơbiă anăn ngă pô pơ ala mơnuih ƀôn sang djop gưl, rơwang bruă thun 2021-2026 hăng hơdră ngă bruă rơđah rơđong tum teč.