VOV4.Jarai - Kual Dap Kơdư glăk amăng bơyan không phang, pơ-iă hang sui amăng hơdôm blan rơgao, ngă kơ hơdôm pluh rơbâo ektar glai rưng ƀơi Gia Lai amuñ apui ƀong biă. Kiăng dưi pơgang apui ƀong glai, tơring čar hơmâo čih kơčăo bruă, laih dong ba tơbiă lu hơdră pơsir đah mơng dưi pơgang glăi djŏp tơlơi truh tơdah hơmâo.

Ană plơi pla ƀơi plơi Đôč 1, să Ia Kreng, tơring glông Čư̆ Pah gơgrong wai lăng giăm 700 ektar glai mơng Anom bruă wai lăng glai pơgang tơlơi truh lŏn adai ngă Ia Ly. Hơdôm hrơi rơnuč blan 3, pơ-iă kơtang kơtit amăng sui hrơi ngă hơdôm blah đang ƀơi anai hơmâo rok krô, rok trang krô amuñ joh mơn yua hnun amuñ hơmâo apui ƀong glai. Kiăng pơgang hlâo, plơi Đôč 1 hơmâo akŏ pơdong grup wai lăng, hyu tir, wai pơgang glai hrơi mlăm mơtăm. Biă ñu, anom bruă brơi čuh rok ƀơi ter guai hơdôm ektar glai ƀơi anih amuñ hơmâo apui ƀong. Ơi Rčom Ho, plơi Đôč 1, să Ia Kreng, tơring glông Čư̆ Pah lĕ sa amăng hơdôm boh sang anŏ gơgrong wai lăng glai brơi thâo:

“Hơmâo ƀing khua jao bruă lĕ gơmơi akŏ pơdong 4 grup hyu tir rim hrơi mơtăm, gir pơgang glai, tơdah hơmâo apui ƀong lĕ ječ ameč jak iâu adơi ayong ling tơhan mơng să, ƀing kông an amăng plơi, čruih apui hmao tlôn mơtăm”

Anom wai lăng glai rưng Ia Ly glăk wai lăng rơbêh 12.500 ektar lŏn glai. Mơng hrơi akŏ bơyan phang mơtăm, anom bruă hơmâo jao bruă kơ khua mua, mơnuih mă buă hyu tir na nao, kiăo thâo rơđah anih anom ƀơi anai, akŏ pơdong hơdră 4 ƀơi anih, laih dong akŏ pơdong grup, grup pơgang apui ƀong glai hơmâo hơdôm rơtuh čô mơnuih. Anom bruă ăt pok pơhai ngă bruă tui boh thâo ia rơgơi kah hăng čuh rok ter guai hơmâo măi krăp lăng, pok jơlan pơgăn apui hăng đang glai amuñ apui ƀong.

Ană plơi ƀơi plơi Đôč 1 rơmet rơmot, jah rok pơgang apui ƀong glai.

Ơi Phạm Thành Phước, Khua anom wai lăng glai rưng Ia Ly, tơring glông Čư̆ Pah, Gia Lai brơi thâo, mah đang glai anom bruă wai lăng dŏ ƀơi lu anih, samơ̆ anom bruă hơmâo prăp lui lu hơdră pơgang apui ƀong glai. Amăng anun neh met wa yơh glêh biă mă amăng bruă djru anom bruă rơmet rơmot, jah rok hăng čuh rok ter guai đah mơng dưi pơgang hlâo apui ƀong glai.

“Bơyan không phang kual Dap Kơdư anai ñu krô, adai pơ-iă hang biă, amuñ hơmâo apui ƀong glai biă, ƀing ta ƀu thâo hlâo ôh, yua hnun anom bruă hơmâo akŏ pơdong grup git gai pơgang apui ƀong glai. Čih hơdră ngă bruă, kĭ pơkôl hăng djŏp plơi pla, hơdôm boh sang anŏ hơdip giăm glai hăng kĭ hră tom hơdôm anom bruă amăng kual lŏn gơmơi wai lăng hăng hơdôm boh să hơmâo glai jao bruă kơ hơdôm grup, anih dŏ gak lĕ lơ̆m hơmâo apui ƀong glai lăi pơthâo kơ pô hlơi, ngă hiư̆m kiăng tañ pơgăn hĭ tơdah hơmâo apui ƀong glai”.

Hoàng Qui:Čih - Siu H’Mai: Pơblang