VOV4.Jarai-Hơmâo lŏn či pơdong sang samơ̆ ƀu dưi pơdong ôh, kŏn dưi sĭ mơdrô pơblơi lơi, ƀu dưi ngă anŏ gơgrong čan prăk, pưk sang răm laih, tăp năng dŏ ƀu hơđong ôh kŏn dưi ming pơkra glăi man pơdong lơi. Anun lĕ tơlơi tơnap hơdôm rơtuh boh sang mơnuih ƀôn sang pơ phường Trà Bá, Hội Phú, Ia Kring, plơi prong Pleiku hlăk tŭ ba añ pran jua hơdôm thun rơgao. Tơlơi tơnap tap mơnuih ƀôn sang, nao rai ƀu gêh găl yua kơčăo bruă yôl lui soh ngă kơ mơnuih ƀôn sang amăng kual anai tơnap tap hăng hil rơ̆t biă mă.

Dŏ amăng anih pơkă hlâo jing kual plơi pla hơmâo jơlan prong Nguyễn Văn Linh arăng či čuk pơkra, lu thun hăng anai laih, rơkơi bơnai Bùi Văn Năm, dơ̆ ƀơi kual jơlan Châu Văn Liêm, plơi prong Pleiku hrom hăng ƀing ană bă khom dŏ amăng sang kơniă, sang tơ̆i hrêp mơ̆ng bơbung trun pơ pơnăng truh pơ atur sang.

Sang anŏ ơi Khiên ƀu dưi pơkra glăi sang dŏ, kŏn dưi mă hră anun gơgrong čan prăk kơnuk kơna yua dŏ amăng anih kơčăo bruă yôl lui hnun

Sang tơdơi kơ 21 thun man pơdong, pơnăng hluh, răm lu. Bơyan hơjan, sang ia ƀruač mơsah abih; ia hram amăng pơnăng; bơbung thao, tôl ăt hluh bring jă hrêp glăi 3 tal laih, kơtit hăng kyâo, samơ̆ ăt hơjan ia ƀruač đôč. 3 amăng 6 cô ană bă ñu hơmâo sang anŏ laih, khom đuăi hyu dŏ sang apah yua ñu ƀu thâo pĕ pơpha lŏn sang, arăng aka ƀu brơi pơdong sang, mah lŏn sang gơñu prong truh 1000 met karê:

“Mơnuih ƀôn sang gơmơi dŏ amăng anih kơčăo bruă kơnuk kơna bơblih yua lŏn mơ̆ tơlơi hơdip mơda lŭk pŭk biă mă, gơmơi tŭ ư kơnuk kơna mă glăi bơblih yua kơ bruă pơkŏn. Samơ̆ sit ngă lĕ khom ngă tañ, kiăng gơmơi tañ hơđong tơlơi hơdip mơda, ră anai tơnap tap biă mă. Jơlan aka ƀu hơmâo, bơyan hơjan nao rai tơbor, dơlut hlŭ, sang anŏ răm rai pơkra glăi arăng ƀu brơi, man pơdong phrâo aka ƀu dưi mơ̆n”.

Ataih mơ̆ng sang ơi Năm ƀu ataih ôh, sang anŏ Quảng Văn Khiên, thun tơkeng 1970 ăt tơnap kah hăng anun mơ̆n. Lŏn hơmâo ƀu thâo pĕ pơpha kơ ană bă 2 čô ăt tơl hyu apah sang dŏ, sang anŏ ơi Khiên anun, sang bruă prăk kơnuk kơna hơngah ƀu brơi čan prăk ôh, hră lŏn sang ngă anŏ gơgrong arăng ƀu ư ôh, yua lăi lŏn sang djơ̆ anih arăng pơkă pioh mă yua bruă pơkŏn.

Hơmâo mơ̆n lŏn tơnah samơ̆ ƀu hơmâo tơlơi dưi yua, ngă bruă tui hăng pô kiăng, ơi Khiên ngă hră mơ-it hyu djop anih laih anun mơ-it kơ lu wơ̆t ƀing pơ ala mơnuih ƀôn sang sit bưp ƀing plĕ hră lăi pơthâo tơlơi tơnap mơ̆ng sang anŏ ñu:

"Hơmâo lŏn đang, pơdong sang ƀu dưi ôh. Hră lŏn sang ba ngă anŏ gơgrong pơ sang bruă prăk kiăng čan prăk bơwih ƀong kŏn dưi lơi mơ̆n, sĭ ƀu dưi sĭ. Ană bă pơprong laih, lŏn hơmâo samơ̆ khom hyu apah sang arăng dŏ. Mơnuih ƀôn sang pơ anai ngă hră mơ-it hyu truh pơ Jơnum min mơnuih ƀôn sang plơi prong Pleiku lu wơ̆t laih.

Gơmơi ăt bưp khua mua ƀing pơ ala mơnuih ƀôn sang lơ̆m rai bưp mơnuih plĕ hră ruah khua gưl tơring čar, gưl dêh čar kiăng lăi glăi kơ tơlơi anai, gơñu ăt ƀuăn laih hăng mơnuih ƀôn sang samơ̆ ƀu ƀuh ngă ôh. Kâo rơkâo kơ jơnum min mơnuih ƀôn sang tơring čar Gia Lai hăng Jơnum min mơnuih ƀôn sang plơi prong Pleiku tơdah ngă tui kơčăo bruă khom ngă bĕ tañ, tơdơi ƀu ngă dơ̆ng tah lui hĭ kơčăo bruă pơkă lui, pioh mơnuih ƀôn sang gơmơi hơđong tơlơi hơdip mơda”.

Yua kơčăo bruă yôl lui hnun truh rơbêh hơpluh thun, anun yơh kual plơi pla mơnuih ƀôn sang pơ anai jing tơnap tap ƀun rin amăng plơi prong Pleiku mơtam

Anai ăt jing tơlơi bưp kar kăi soh mơ̆ng hơdôm rơtuh boh sang anŏ hơmâo lŏn hăng sang amăng kual arăng pơkă mă glăi yua bruă pơkŏn pơkra jơlan Nguyễn Văn Linh. Hlâo kơ anun, kơčăo bruă anai, dưi hơmâo Jơnum min mơnuih ƀôn sang tơring čar Gia Lai pơsit jao kơ kông ty pơčruh ngăn Tuh pơ alin Saigon Highland pok pơhai mơ̆ng thun 2009, abih bang anih lŏn pơkă 94 hektar.

Samơ̆, truh thun 2015, sang bruă anai ƀu anăm ngă ôh, bruă pok pơhai ƀu djơ̆ hrơi pơkă anun kơnuk kơna mă glăi. Thun 2017, Jơnum min mơnuih ƀôn sang plơi prong Pleiku tŭ mă tơlơi jao mơ̆ng khua tơring čar pơkă glăi kual lŏn dŏ 39,7 hektar amăng hơdôm boh phường Trà Bá, Hội Phú hăng Ia Kring. Thun 2019, Jơnum min mơnuih ƀôn sang tơring čar Gia Lai ăt jao kơ jơnum min mơnuih ƀôn sang plơi prong Pleiku pok pơhai kơčăo bruă anai, mă yua prăk kơnuk kơna tuh pơ alin.

Ơi Nguyễn Hữu Quế, Khua Jơnum min mơnuih ƀôn sang plơi prong Pleiku brơi thâo, djop anom bruă amăng plơi prong hlăk pok pơhai hơdră pơphun mă bruă. Ră anai, hlăk čih pơkra rơnoh prăk duh glăi kơ mơnuih ƀôn sang hăng dram gơnam mơnuih ƀôn sang jao kơ Khul khua mua pơtong glăi rơnoh tơring čar. Khă hnun, ơi Quế ăt kŏn thâo lơi hơbin pok pơhai, kơnong lăi gir run ngă tui kơčăo bruă anai tañ hloh mơ̆n pơ anăp anai.

“Tơdơi kơ khul khua mua pơtong glăi rơnoh mơ̆ng tơring čar tŭ ư, plơi prong amra pok pơhai mơtam kơčăo bruă tŏ tui djơ̆ tơlơi phiăn. Ƀing gơmơi amra gir run pok pơhai tañ amăng hrơi blan pơ anăp tañ hloh pơgang tơlơi dưi kơ mơnuih ƀôn sang amăng kual hơmâo kơčăo bruă anai”.

Ƀuh rơđah, hăng bruă pơhrŏ tui kual pơdong plơi pla jơlan Nguyễn Văn Linh mơ̆ng 94 hektar trun dŏ 39,7 hektar, tơring čar Gia Lai hơmâo djru kơ hơdôm rơtuh boh sang anŏ amăng plơi prong Pleiku huăi dŏ tơguan čang na nao.

Bơ hơdôm rơtuh boh sang anŏ ăt dŏ đôm amăng kơčăo bruă pơkă lui anun ăt dŏ tơguan na nao aka ƀu thâo hơbin pơsir giong. Gơñu čang rơmang, khua mua tơring čar, plơi prong Pleiku tañ pơsir, khom jŭ yap rĭm hrơi, rĭm blan, ƀu dưi tơguan hăng thun ôh yap mơ̆ng thun 2009 truh ră anai.

Nguyễn Thảo čih: Nay Jek pơblang