VOV4.Jarai - Bơyang phang sui đơi, ia čăt amăng rơgŭp lŏn hăng ia mơng hơdôm boh dơnao lêng thu krot, ngă kơ hơdôm blah hmua bơyan Puih phang ƀơi tơring glông Čư̆ Pah, tơring čar Gia Lai djai krô. Hăng hơdôm boh sang anŏ ngă pơdai yơh phun, bơyan anai kar hăng lui soh yơh.

Lăng nao hơdôm blah hmua ƀơi Ia Sah krô kar hăng apui ƀong, ơi Rčŏm Chíu, dŏ ƀơi plơi Mrông Yố 2, să Ia Ka, tơring glông Čư̆ Pah ƀu thâo anŏ ngă dong tah, dŏ rơngôt đôč yơh. Bơyan pơdai puih phang anai kar hăng lui soh yơh, laih anun ñu aka ƀu thâo ngă hiư̆m pă đah mơng hơmâo prăk pơhrui amăng hrơi blan pơ anăp:

“Sang kâo ngă 3 sao pơdai, 1 sao pơhrui glăi hơmâo mơng 6 truh 7 tạ pơdai, rim thun pioh ƀong djŏp mơn. Khă hnun, ha thun anai kơƀah laih, ƀong ƀu djŏp dong tah, lơ̆m anun hơmâo lu mơnuih arăng glăk yuă, pơdai djai abih lĕ yua kơƀah ia, ha asar ia hai ƀu thâo hơmâo lơi, ră anai kơnuk kơna pơtô ba gơmơi pla phun hơget lĕ gơmơi hla tui đôč yơh”.

Mơnuih ƀon sang dŏ rơngôt ƀơi hmua pơdai djai krô.

Ataih mơng hmua ơi Rčom Chíu ƀu ataih ôh, giăm 4 sao pơdai mơng ơi Rčom Luyên, ăt djai krô mơn. Tui hăng ơi Luyên, anai lĕ thun tal 2 sang anŏ ñu hơmâo hơmâo pơdai ba glăi mơng hmua Ia Sah.

“Hơdôm thun hlâo adih ăt hơmâo ƀong mơn, mơng 2 truh 3 thun hăng anai ƀu hơmâo ia, adai phang khot, pơdai djai krô. Gơnang kơ gong gai, Ping gah hăng Kơnuk kơna sem lăng lŏn hmua anai pla phun hơget mơng djơ̆”.

Ơi Hoàng Văn Thành, Kơ-iăng khua Jơnum min mơnuih ƀon sang să Ia Ka, tơring glông Čư̆ Pah brơi thâo, lu thun anai, neh met wa djuai ania Jarai ƀơi să lêng ngă hmua pla pơjing kiăo tui ia čă, ia amăng čroh hnoh đôč, bơ ƀu hơmâo ia mơng dơnao ôh. Thun anai, không phang sui đơi, ia thu abih mơn, yua hnun pơdai krô abih. Mrô jŭ yap mơng blung a brơi ƀuh, hơmâo laih rơbêh 70 ektar pơdai bơyan puih phang ƀơi să ƀu mơboh, đa lĕ lui ruh, hăng giăm 200 akŏ sang anŏ ngă pơdai ƀu ƀong, lu biă ñu lĕ ƀơi plơi Mrông Yố 1 hăng 2. Ơi Hoàng Văn Thành bơngơ̆t, tơdah ƀing khua ƀu tañ pơtô ba ană plơi pơplih phun pla lĕ bơyan pơ anăp anai ăt lui ruh tui anai mơn:

“Hrơi anai kâo ăt rơkâo ƀing khua hơmâo hơdră pơsir, hơmâo prăk djru kơ neh met wa ngă glăi hmua. Tui tơlơi đăo lăng hlâo lĕ thun tơdơi anai ăt phang khot dong mơn, Jơnum min mơnuih ƀon sang să amra ngă hrŏm hăng hơdôm anom bruă gưl prong, gong gai să ăt ngă hrŏm kơjăp hăng neh met wa mơn kiăng pơtô brơi neh met pla phun ƀiă hrơi, lăp djơ̆ hăng lŏn adai ƀơi anai amăng bơyan phang pơ anăp”.

Sa blah hmua pơdai krô kơñĭ abih yua kơƀah ia.

Ơi Trần Đắc Thắng, Kơ-iăng khua anom ngă hmua hăng pơđĭ kyar plơi pla tơring glông Čư̆ Pah brơi thâo, anom bruă hơmâo lăng glăi abih mrô hmua amăng bơyan puih phang. Bơyan puih phang thun anai, tar ƀar tơring glông hơmâo tơbêh 1700 ektar pơdai lĕ hơmâo truh 170 ektar hmua kơƀah ia, lui ruh ƀu ƀong ôh. Kiăng pơsir hĭ tơlơi anai, biă ñu lĕ phun pơdai glăk bưp adai không phang, ơi Trần Đắc Thắng brơi thâo:

“Anom bruă nga hmua hăng pơđĭ kyar plơi pla ngă hrŏm kơjăp hăng Anom bruă ngă hmua ăt kah hăng Jơnum min mơnuih ƀon sang hơdôm boh să lăng glăi abih đang hmua bơyan puih phang, biă ñu hmua ngă pơdai. Kơnong brơi pla ƀơi đang hmua hơmâo ia đôč, bơ ƀơi kual kơƀah ia lĕ kiăng mơnuih ƀon sang hơdai pla phun kyâo lăp djơ̆, tui anun kah adai không phang huăi bơbeč sat kơ tơlơi hơdip mơnuih ƀon sang”

Hoàng Qui: Čih - Siu H’Mai: Pơblang