VOV4.Jarai - Jơnum min mơnuih ƀon sang tơring čar Gia Lai pơphun Jơnum lăi pơthâo tơlơi gơgrong bruă mơng ƀing ngă khua amăng bruă ngă tui djŏp tơlơi pơtrun mơng Jơnum min mơnuih ƀon sang tơring čar. Amăng 5 thun rơgao, hơdôm anom bruă mơng tơring čar hơmâo pok pơhai ngă tui klă Tơlơi pơkôl pơkă mă bruă mơng Jơnum min mơnuih ƀon sang tơring čar rơwang thun 2016-2021 hăng hơdră ngă bruă “hruă kơjăp ngă tui tơlơi pơkôl pơkă, pơđĭ tui tơlơi gơgrong bruă mơng pô ngă khua, pơđĭ tui tơlơi rơgơi pơphô bruă, ngă hrŏm mơng djŏp gưl, anom bruă”. Klah čun glăi mông jơnum, Khua Jơnum min mơnuih ƀon sang tơring čar Gia Lai ơi Võ Ngọc Thành kiăng pô ngă khua mơng djŏp anom bruă kiăng pơđĭ tui tơlơi gơgrong bruă kiăo tui tơlơi pơtrun mrô 01 mơng Khua Jơnum min mơnuih ƀon sang tơring čar hăng Tơlơi pơkôl pơkă mă bruă mơng Jơnum min mơnuih ƀon sang tơring čar, pơphun lăng glăi tơlơi phiăn ngă bruă mơng rim gơnong bruă, anom bruă. Rim anom bruă kơnuk kơna khŏm črâo bruă rơđah rơđông kơ rim čô mơnuih, samơ̆ pô ngă khua khŏm thâo rơđah tŏng ten djŏp bruă mă, anih mơ̆ gơñu wai lăng.

Siu H’Mai: Pơblang