VOV4.Jarai - Hơdôm boh tơring glông, plơi prong mơng tơring čar Gia Lai glăk gir pôr pơthâo bruă ruah khua pơ rim boh plơi pla ataih, asuek, djru neh met wa djŏp djuai ania thâo hluh kơ tơlơi dưi hăng tơlơi gơgrong bruă mơng pô ñu amăng bruă ruah khua pơ anăp.

Ơi Nguyễn Đăng Chung, Khua Jơnum min mơnuih ƀon sang să, Kơ-iăng khua Jơnum min ruah khua să Đông, tơring glông Kbang, tơring čar Gia Lai brơi thâo, să hơmâo lăng glăi abih bang, kơđŏm pơsit hră čih anăn ƀing nao plĕ hră, laih dong pôr pơthâo na nao kơ bruă ruah khua kiăng abih bang mơnuih nao plĕ hră thâo hluh hăng ngă tui djŏp tơlơi dưi mơng ƀing gơñu:

“Truh mông anai, bruă prăp lui mông ruah Khua pơ ala mơnuih ƀon sang dêh čar tal 15 hăng khua Jơnum min pơ ala mơnuih ƀon sang djŏp gưl rơwang thun 2021-2026 lĕ gơmơi hơmâo pơhlôm djơ̆ hrơi pơkă. Bruă čih anăn ƀing nao plĕ hră lĕ gơmơi hơmâo hră git gai kơ kông ang să pôr pơthâo hăng hơdôm boh plơi pla, truh ră anai ƀơi să gơmơi hơmâo laih anăn ƀing nao plĕ hră laih anun gơmơi glăk jao glăi kơ hơdôm boh plơi pla lăng glăi pơhlôm hŭi pơgao lui pô hlơi, laih anun pơhlôm tơlơi dưi mơng ƀing nao plĕ hră”.

Hăng să Đăk Talay, tơring glông Mang Yang, hơmâo rơbêh 80% mrô mơnuih djuai ania Bahnar, dua hrơi ha wơ̆t, ƀing khua mơng să đĭ rơdêh thut, ba nao lua pôr pơhing hăng ƀơk hră pôr pơthâo kơ mơnuih ƀon sang. Hră pơhing plĕ ƀơi jơlan kơ bruă ruah khua ăt kah hăng ƀang pôr jua pơhiăp ăt hơmâo pôr pơthâo hăng dua tơlơi mơn, tơlơi Bahnar hăng tơlơi Yuan kiăng abih bang mơnuih thâo hluh. Ayong Đinh Gôn - mơnuih mă bruă amăng să Đăc Talay brơi thâo:

“Neh met wa pơ anai nao ngă bruă mơng bơbrui, yang hrơi tlam mơng 5 , 6 mông kah mơng glăi. Juăt ñu gơmơi hyu iâu hăng lua, mơng 5 mông kiăng ană plơi hmư̆ lu. Pôr pơhing hăng tơlơi djuai ania gơmơi. Gơmơi pôr pơthâo tui anun kah neh met wa mơng thâo hluh”.

Ơi Đinh Đình Chi, Khua anom gru grua pôr pơhing tơring glông Kbang brơi thâo, hăng mrô ană mơnuih giăm 46% lĕ djuai ania ƀiă, bruă pôr pơthâo kơ ƀing gơñu ăt khŏm ngă hăng lu hơdră phara mơn, djơ̆ hăng gru grua mơng rim djuai ania mơn. Ha bơnah dong, anom bruă pôr pơthâo kơ bruă ruah khua hăng lua amăng să, amăng plơi, ha bơnah dong lĕ hyu tep hră, ngă gru pôr pơhing ƀơi bơnal hăng đĭ rơdêh hyu pôr pơthâo:

“Hăng tơlơi pôr pơthâo hăng tơlơi pơtô ba mơng Anom pơtô bruă Ping gah ăt kah hăng grup hyu pơtô pơblang mơng jơnum min ruah khua lĕ anom bruă glăk pơphun kač, rek, in ƀơi hră tep pơ tơring glông, ƀơi tơring kual. Truh mông anai lĕ bruă pôr pơthâo hăng rup hơmâo ngă laih hăng 300 m2 panô, áp phích. Čih pơkra jơlan hơdră anăp nao mông plĕ hră ruah khua. Grup hyu pôr pơhing hơmâo čih pơkra tơlơi ngă sen, tơlơi pôr pơthâo, pơsit anih nao pơtô, pôr pơhing”.

Hăng bruă pôr pơthâo bruă ruah khua ƀơi Gia Lai hăng lu hơdră phara mơng rup, măi pôr pơhing, pơtô pơblang hăng amăng bah dong. Pơtrut pôr pơhing amăng kual mơnuih djuai ƀiă hăng tơlơi Jarai, Bahnar...Yă Phạm Thị Lan, Kơ-iăng khua Jơnum min djŏp djuai ania mơnuih mơnam Việt Nam tơring Gia Lai brơi thâo anŏ tŭ yua mơng grup “pôr pơhing hăng amăng bah” ƀuh rơđah ƀơi hơdôm kual ataih yaih”

“Biă ñu lĕ ƀing hơmâo arăng đăo gơnang, ƀing tha plơi, khua plơi pơhiăp hăng tơlơi Jarai, Bahnar mơtăm pơblang brơi rim čô mơnuih. Mơng hơdră pôr pơhing anai lĕ lu neh met wa, biă ñu lĕ mơnuih djuai ƀiă gơñu thâo hluh rơđah, mă hla pơ-ar nao plĕ ruah mă pô gơñu lăng hơmâo tơlơi pơmin hiam, mă bruă rơgơi đah mơng dưi ngă Khua jơnum min pơ ala mơnuih ƀon sang djŏp gưl”.

Hrơi plĕ hră ruah khua pơ ala mơnuih ƀon sang dêh čar tal 15 hăng khua jơnum min pơ ala mơnuih ƀon sang djŏp gưl rơwang thun 2021-2026 giăm truh laih. Mơnuih ƀon sang djŏp djuai ania ƀơi Gia Lai ăt glăk tơguăn Hrơi jơnum prong mơng lŏn ia ta.

Siu H’Mai: Pơblang