VOV4.Jarai - Tom brơi (4/4), 50 čô mơnuih apăn bruă gah ia jrao ƀơi sang ia jrao pioh pơjrao mơnuih ƀă klin Covid-19 tơring čar Gialai hơmâo pơgiong bruă pơčlah 14 hrơi, dưi glăi mă bruă pơ anih hơđăp. Laih dong Jơnum min mơnuih ƀon sang tơring čar Gialai pơsit pơdơi mă bruă ƀơi sang ia jrao pioh pơjrao mơnuih ƀă klin Covid-19. Tui tơlơi pơsit mơng Jơnum min mơnuih ƀon sang tơring čar Gialai, Sang ia jrao pioh pơjrao mơnuih ƀă klin Covid-19 amra pơdơi mă bruă dong mơng hrơi anai lơ 5/4.

 Amăng hrơi blan mă bruă, hrŏm hăng tơlơi gir run amăng bruă ia jrao mơng Sang ia jrao Chợ Rẫy ( ƀôn prong Hồ Chí Minh) hăng Anom bruă wai pơgang klin kual Dap kơdư, sang ia jrao hơmâo pơgiong bruă pơjrao suaih brơi 27 čô mơnuih ƀă klin amăng tơring čar. Yua anun, truh ră anai, ƀing nai ia jrao, ơi ia jrao rơnuč amăng ƀing mơnuih djru pơgang klin Covid-19 ƀơi Gialai hơmâo pơgiong bruă jao hăng glăi mă bruă pơ anih hơđăp.

Siu Đoan: Pơblang