VOV4.Jarai - Mơguah lơ 2/4, Jơnum min mơnuih ƀôn sang tơring čar Gialai pơphun Jơnum lăng nao rai amăng tivi klah čun ƀơbiă bruă pơđĭ kyar bơwih ƀong – mơnuih mơnam, pơhlôm rơnuk rơnua plơi pla lŏn ia 3 blan tal sa, pok pơhai bruă mă amăng 3 blan tal 2 thun 2021. 3 blan tal 2 thun 2021, khă khom bŏng glăi hăng lu tơlơi tơnap yua kơ klin Covid-19 gluh đĭ ƀơi sa dua anih anom amăng tơring čar, samơ̆ tơring čar Gialai hmâo pơsit laih pran jua pơkă, ngă kơdun hĭ klin ruă. Amăng 3 blan tal sa thun 2021, ngă tui ha amăng plĕ “Bruă mă dua mơta sa wot” pơgăn rah klin Covid-19, đing nao pơđĭ kyar rah bruă bơwih ƀong – mơnuih mơnam, pơđut bơyan phang thun 2020-2021, đơ đam tơring čar hmâo rah pla rơbêh kơ 77.000 ektar đang phun pla djop mơta. Nua mơng gơnam mă mơng măi mok 3 blan akô̆ thun 2021 hmâo rơbêh kơ 5.525 klai prăk. Abih bang prăk tuh pơplai abih bang mơnuih mơnam amăng tơring čar 3 blan akô̆ thun him lăng ngă tui 13.996 klai prăk, hmâo 20% kơčăo bruă. Ăt amăng 3 blan tal sa mơn, tơring čar hmâo pơsit tơlơi pơsit kơ hơdră pơtrun tuh pơplai kơ 7 rơwang bruă hăng abih bang prăk mă yua 1.988 klai prăk hăng hmâo 220 bôh anom bơwih ƀong, 48 bôh anom gah pơdŏng phrâo./.

Siu H’ Prăk: Pô pơblang