VOV4.Jarai - Tơring čar Gialai hmâo kơtưn pok pơhai hơdôm bôh yôm lăi pơhing kơ bruă ruah khua pơ ala mơnuih ƀôn sang dêh čar ta tal 15 hăng khua pơ ala Jơnum min pơ ala mơnuih ƀôn sang hơdôm gưl rơwang bruă 2021-2026 hăng kual neh wa djuai ania ƀiă hăng lu hơdră sit nik, djơ̆ hăng bôh thâo rim djuai ania. Kiăo tui anun, tơring čar Gialai hmâo jao laih kơ ƀirô gơgrong bruă anai dăp hơdră hơdôm bôh yôm djơ̆, sit nik, amuñ hmư̆, amuñ thâo hluh hrom hăng pơblang jing 2 mơta tơlơi pơhiăp: Tơlơi Yuan hăng Jarai kiăng mơnuih ƀôn sang amuñ thâo hluh, amuñ ngă tui. Bôh yôm lăi pơhing đing nao bôh tơhnal, tŭ yua, tơhnal yôm phăn mơng bruă ruah khua; hơdôm tơlơi pơhing tơlơi phiăn hmâo bơdjơ̆ nao kah hăng Phiah phiăn 2013, Tơlơi phiăn ruah khua pơ ala mơnuih ƀôn sang dêh čar hăng ruah khua pơ ala Jơnum min pơ ala mơnuih ƀôn sang; hơdôm hră pơ-ar pơtô brơi bruă ruah khua mơng Kơnuk kơna, mơng Jơnum min apăn bruă Khua pơ ala mơnuih ƀôn sang dêh čar hăng Khul wai lăng bruă ruah khua lŏn ia. Kiăng bruă lăi pơhing sit nik ba glăi bôh tơhnal, Jơnum min ruah khua hơdôm gưl ƀơi tơring čar Gialai hmâo iâu pơhrui laih mơnuih mă bruă lĕ tha plơi, mơnuih hmâo arăng đăo gơnang amăng hơdôm bôh plơi pla gum hrom bruă lăi pơhing hyu./.

Siu H’ Prăk: Pô pơblang