VOV4.Jarai - Tơlơi pơhing tơring čar Gialai lăi pơthâo kơčăo buă rơkâo pơplih rơbêh kơ 8000 ektar lŏn dlai hơđăp ƀơi să Ia Mơr, tơring glông Čư̆ Prông hơdai nao lŏn ngă đang hmua kiăng ngă kual pơđoh ia kơ Ring bruă hnoh ia Ia Mơr ngă laih tơlơi phă dlai mă lŏn ngă đang hmua mơng mơnuih ƀôn sang ƀơi anai kơtang tui. Tơlơi anai ngă bruă wai lăng, pơgang dlai klô ƀơi kual anai tơnap tap laih, ră anai jai tơnap tap hloh dong.

Kơnong amăng mlăm 15/4, rơbêh kơ 3.300 met kơ rê lŏn dlai ƀơi añrông sa, kual 1, ƀut 1001, dlai gah Grŭp wai lăng dlai pơgang hlôm hlâo Ia Mơr, tơring glông Čư̆ Prong, ataih mơng hnoh ia phun Ia Mơr phrâo pơkra giong năng ai ñu 100 met jơlan čim por, čuh lui tơdang. Phun kyâu hmâo koh lui ba glăi, črăn phun kyâu ăt dô̆ čơcui kơ apui ƀong mơn. Pel ĕp ƀơi anih anom anun, ơi Nguyễn Tuấn Anh, Kơ-iăng Khua Jơnum min mơnuih ƀôn sang să Ia Mơr, brơi thâo, anai lĕ tơlơi phă dlai agaih bơhi mơtăm pioh mă lŏn ngă đang hmua. Ră anai, kơnong yap mă să Ia Mơr, mơnuih ƀôn sang hmâo truh kơ 500 ektar lŏn ngă đang hmua plah nao rai amăng dlai hơđăp ƀlêng ƀlông. Bôh nik ñu, tơlơi gô̆ mă lon ia hmâo mơng sui laih hăng na nao mơng thun anai truh thun adih:

“Gah jơlan hơdră lĕ, gơñu amra gô̆ mă ƀiă, tui bơyan. Blung a băn lui phun kyâu, kiăng kyâu djai, tơdơi kơ anun pla phun bôh ñông kiăng bơyan pơ̆ anăp hmâo phun ñông čat đĭ”.

Rơbêh kơ 3 ar dlai klô ataih mơng hnoh ia Ia Mơr hmâo arăng čuh lui amăng sa mlăm

Ơi Đinh Văn Khẩn, Khua Grŭp wai lăng dlai Ia Mơr, anom bruă hmâo giăm truh 4000/8000 ektar dlai hơđăp glăk dưi lăi pơthâo kơ Khua pơ ala mơnuih ƀôn sang dêh čar ta brơi pơplih hơdai nao ngă đang hmua pioh ngă kual pơđoh ia  kơ Hnoh ia Ia Mơr brơi thâo, mơng rơnuč thun 2020 truh ră anai, tơlơi gô̆ mă yua dlai ngă hang tơngia biă. Kiăo tui anun, blan 1, pô dlai thâo ƀuh 4 mơta tơlơi, hmâo abih bang rơbêh kơ 5 ar, samơ̆ truh rơnuč blan 3, abih bang mrô mơta tơlơi hmâo laih 29, hăng abih bang lŏn gô̆ mă giăm truh 4 ektar. Anun lĕ mrô yap mă hơdôm tơlơi dưi pơsit pô ngă soh. Bơ̆ lŏn dlai ƀu anet pơkon hmâo arăng gô̆ mă samơ̆ akă dưi pơsit pô ñu, ƀing dŏp kyâu dlai amra kơdŏng glăi mơnuih pơgang dlai lom thâo gơñu mă.

“Adơi ayong hyu mlăm mơmot, tơdah ƀuh mơ̆, khul pơgang dlai ƀiă mơnuih arăng gôm adung mơbah, ƀuh mă dua asar mơta đôč, djă thong gă koh adơi ayong. Tơdah khul pơgang lu mơnuih gơñu đuăi mut amăng dlai dŏp, ta ƀu thâo hlơi ôh. Ră anai, adơi ayong amăng grŭp lĕ kơnong kơ pơdơi sa hrơi amăng rơwang hrơi tơjuh, pơplih nao rai pơdơi”.

Lu kual dlai klô ƀơi Gialai răm rai dong 

Ơi Phạm Vũ Tú, Kơ-iăng Khua Jơnum min mơnuih ƀôn sang tơring glông Čư̆ Prông brơi thâo, ƀơi kual 8000 ektar lŏn dlai hơđăp glăk dưi hmâo tơring glông lăi pơthâo rơkâo Khua pơ ala mơnuih ƀôn sang dêh čar ta brơi hơdai nao ngă đang hmua ngă kual pơđoh ia mơng Hnoh ia Ia Mơr, ră anai hmâo 2 pô dlai hăng sa anih anom wai lăng. Mơng rơnuč thun 2020 truh ră anai, tơring glông hmâo pơdŏng dong hăng djă pioh na nao bruă mă mơng 5 grŭp pơlir gơnong bruă, amăng anun hmâo ling tơhan pơgang guai dêh čar, kông ang, tơhan wai lăng dlai klô gum hrom hăng pô dlai hăng gong gai plơi pla, ngă tui bruă hyu tir, wai lăng. Khă hnun hai, anai kơnong kơ jơlan gah kiăng pơsir ƀơi anăp đôč, hăng tơnap biă kiăng pơgăn abih bang bruă dlai hmâo arăng gô̆ mă:

“Hơdôm grŭp hyu mă bruă pơdŏng hơdôm anih dô̆ gak ƀơi hơdôm anih anom phun, hơdôm anih anom amra rơngiă dlai klô. 2 grŭp wai lăng dlai lĕ pô dlai, hơdôm bôh să hmâo dlai khom pơsir khŏp amăng bruă wai lăng, pơgang dlai klô. Bơ̆ tơlơi pơmin lĕ, ƀing gơmơi khom ngă tui khop amăng bruă djă pioh dlai, samơ̆ ñu ƀu amuñ ôh”.

Lom đang kyâu akă dưi pơplih, dlai Ia Mơr hmâo arăng gô̆ mă đơr hơr laih. Ră anai tơdah ƀu hmâo jơlan gah pơgăn ba glăi bôh tơhnal thơ, ƀu djơ̆ kơnong kơ mrô lŏn dlai glăk rơkâo pơplih ôh mơ̆, wot kual dlai klô prong prin ƀơi kual guai lŏn ia anai ăt amra pơplih jing đang hmua mơn./.

Nguyễn Thảo: Pô čih – Siu H’ Prăk: Pô pơblang