VOV4.Jarai - Anai lĕ kual juăt không phang ngă răm rai kơtang, truh ră anai, neh met wa ƀơi plơi K Te, să H’Bông, tơring glông Čư̆ Sê, tơring čar Gialai hơmâo hơđong tơlơi bơwih ƀong huă hăng prăk pơhrui hơmâo hmăi mơn yua kơ pla tơbâo. Sa amănghơdôm kual juăt kơƀah ia kơtang hloh amăng tơring čar, ră anai jing kual pla tơbâo prong hloh, tơbâo hiam, koh pơhrui lu, ngă kơ mơnuih ƀon sang hơmâo prăk pơhrui hơđong.

Glăk amăng bơyan không phang, samơ̆ hmua pla tơbâo lăng mơta mơda ƀơi đang hmua plơi K Te, anai lĕ kual lŏn amăng bơyan phang juăt kơƀah ia biă mă ƀơi hơdôm đang hmua đơ đam să H’Bông, gah tơring glông Čư̆ Sê, tơring čar Gialai. Ayong Rơ Ô Mân, mơnuih ƀon sang plơi K Te glăk kai hmua hlâo kơ pla tơbâo phrâo tơdơi kơ abih 5 thun yua pơjeh hơđăp. Rơ Ô Mân brơi thâo, sang anŏ ñu pla 2 ektar hmua tơbâo mơng thun 2016 hăng rĭm thun lêng kơ koh pơhrui glăi rơbêh 200 tơ̆n, hăng kmlai ƀiă biă ñu 50 klăk prăk. Kar hăng amăng bơyan laih rơgao, nua sĭ lu ƀiă bơyan hlâo, sang anŏ ñu pơhrui glăi lu dua wŏt.

Hlâo anun pla kơtor, plum đa pơhrui hơmâo đa ƀu hơmâo. Ră anai hơdai nao pla tơbâo, đang tơbâo bluh đĭ hiam biă mă, pơhrui glăi lu mơn pơhmu hăng pla plum, kơtor. Duh hĭ prăk tuh pơ alin, 1 ektar sang anŏ dưi pơhrui glăi 50 klăk prăk.

Tơdơi kơ 5 thun koh pơhrui, lu mơnuih ƀon sang plơi K Te glăk prap pla phrâo dong

Ƀuh neh met wa amăng plơi pla tơbâo ba glăi tŭ yua, ayong Rmah Loe, dŏ ƀơi plơi K Te ăt hrăm tui, pla rơbêh 2,2 ektar tơbâo. Anai lĕ tal blung a ñu pla tơbâo, yua anun ñu dŏ sư̆ rơbư̆ mơn, samơ đang tơbâo kơ sang anŏ ayong Loe ăt bluh đĭ hiam. Ayong Rmah Loe hok mơ-ak biă yua kơ tơbâo ăt lăng hiam mah amăng bơyan không phang khŏt ia.

Pơhmu hăng phun pla phun pơkŏn pla tơbâo gal ƀiă, să gơmơi kơƀah ia na nao, samơ̆ tơbâo lĕ phun pla dưi hơdip kơtang amăng bơyan phang. Tơdah kual lŏn mơnai hiam amra dưi koh pơhrui mơng pă truh pơ rơma thun. Ră anai ƀing gơmơi glăk man pơdong sang phrâo, hăng amra blơi rơmô, bê pioh rông tơdah tơbâo dưi pơhrui glăi hơmâo hmăi.

Ơi Siu Loan, khua plơi brơi thâo, K Te lĕ plơi pla mơnuih ƀon sang hơdip tơnap tap biă mă hăng rơbêh 300 boh sang anŏ djuai ania Jarai. Amăng 5 thun giăm anai, lu sang anŏ amăng plơi mơng pla hơdôm phun ƀiă hrơi, pơhrui glăi ƀu hơmâo hơdai nao pla tơbâo. Hơmâo tơlơi gum djru mơng Gong gai ƀon lan, neh met wa ƀơi anai hơmâo arăng djru brơi bruă kai ngă hiam glăi lŏn hmua, pơjeh tơbâo, boh thâo pla pơjing hăng hơmâo anom bơwih ƀong sĭ mơdrô kĭ pơkôl amra blơi pơhrui abih.

Hlâo adih neh met wa ăt pla tơbâo samơ̆ ƀu đing nao đơi ôh yua anun pơhrui ƀu hơmâo, tơdơi anai hơmâo lu sang anŏ khin hơtai pla tơbâo, mơng sang anŏ ƀun rin ră anai ăt hơđong tơlơi hơdip laih amăng bơwih ƀong huă. Čang rơmang Kơnuk kơna amra djru brơi dong, hơdôm kual kơƀah ia yua amra khuer ia bơmun mơng anun kah mơng hlơi hlơi lêng kơ dưi pla tơbâo. Ƀơi plơi K Te kơnong tơbâo đôč dưi bluh đĭ hiam.

Hơdôm phun pla pơhrui ƀu hơmâo ƀơi să H’Bông arăng lui hĭ, hơdai nao pla tơbâo, ba glăk prăk pơhrui lu ƀiă

Ơi Phạm Công Viên, Khua Jơnum min mơnuih ƀon sang tơring čar să H’Bông brơi thâo, tơbâo ƀơi plơi K Te hơmâo rơbâo 60 boh sang anŏ pla hăng rơbêh 100 ektar. Pơsit tơbâo lĕ phun pla phun, gong gai să H’Bông tŏ tui pơtrut pơsur neh met wa hơdai nao pla tơbâo, ƀơƀrư̆ djru brơi neh met wa hrưn đĭ pơklaih mơng ƀun rin.

Plơi K Te hơmâo anŏ gal prong hloh lĕ mơnuih ƀon sang hrăm hăng ngă tui boh thâo phrâo tañ ƀiă pơhmu hăng plơi pla pơkŏn, plơi tong krah să, mơnuih ƀon sang hơmâo đang hmua hăng gêh gal kiăng pơđĭ kyar bruă pla tơbiă. Lơ̆m ƀing gơmơi pơphun bruă pla tơbâo klă ƀơi plơi K Te amra pơphun brơi hơdôm plơi pla pơkŏn dong.

Mơng hrơi pla tơbâo, tơlơi hơdip kơ neh met wa djuai ania Jarai ƀơi plơi K Te jai hrơi trơi pơđao. Kual lŏn juăt không phang kơƀah ia ră anai lăng phun tơbâi mơtah mơda, mơng anun pơtrut pơsur mơnuih ƀon sang pơklaih mơng ƀun rin hơđong kjăp.

Siu Đoan: Pơblang