VOV4.Jarai - Jơnum min mơnuih ƀôn sang tơring čar Gialai phrâo hmâo hră pơ-ar ječ rơkâo hơdôm anih anom amăng đơ đam tơring čar pơdơi hơdôm bruă mă tum pơƀut lu mơnuih, hơdôm bruă mă ƀu kiăng đơi kiăng pơgang klin Covid-19 mơng 12 mông mlăm lơ 8/5. Tui hăng bôh yôm hră pơ-ar, Jơnum min mơnuih ƀôn sang tơring čar Gialai rơkâo hơdôm tơring glông, plơi prong amăng đơ đam tơring čar pơdơi hơdôm bruă mă bôh thâo, bơkơjăp drơi jăn, jơnum ngui, jơnum bruă tum pơƀut lu mơnuih; pơdơi jăng jai hơdôm bruă mă ƀu kiăng đơi kah hăng karaoke, anih sĭ tơpai mơñum, anih adôh suang, massage, anih pơdah phim, hơdôm anih anom ngui điện tử, internet, dơnao ia luai... mơng 12 mông mlăm lơ 8/5. Sa dua anih anom sĭ mơdrô kơ phê mơñum, ƀong huă, bơkơjăp drơi jăn amăng sang dưi ngă tui mơn, samơ khom ngă tui hơdôm ơtlơi pơkă pơgang pơgăn klin; mơnuih ƀôn sang hyu čuă ngui, ƀudah hơdôm anih anom tuai čuă ngui leng kơ khom gôm adung mơbah. Jơnum min mơnuih ƀôn sang tơring čar Gialai rơkâo gơnong bruă ia jrao pơhlôm wai lăng pơgăn lar tưp klin; kơtưn pel ĕp, bơtơhmal hăng hlơi ƀu gôm adung mơbah ƀơi anih hmâo lu mơnuih jưh. Yap truh čơtlăm lơ 7/5, Gialai ngă giong laih bruă tlâ̆o pơgang brơi rơbêh kơ 18 rơbâo liều vaccine pơgang Covid-19./.

Siu H’ Prăk: Pô pơblang