VOV4.Jarai - Khul pơgang klin Covid-19 tơring čar Gialai phrâo pơtrun akŏ bruă kiăng pơhlôm gah bruă ia jrao hăng pơgang klin Covid-19 brơi kơ hrơi plĕ hră ruah Khua pơ ala mơnuih ƀon sang dêh čar tal XV hăng Khua khul pơ ala mơnuih ƀon sang djop gưl rơwang thun 2021-2026. Akŏ bruă anai lĕ pơhlôm pok pơhai ha amăng plĕ gah bruă ia jrao kiăng pơgang kjăp klin Covid-19 hŭi kơ lar hyu amăng tơring čar; laih dong pơhlôm bruă ia jrao, pơhlôm hơdjă gơnam ƀong huă, hmao tlôn pơsir hĭ lơ̆m hơmâo tơlơi truh sat hăng pơhlôm rơnuk rơnua brơi ƀing mơnuih tơbiă anăn ruah ngă khua, ƀing mơnuih apăn bruă nao plĕ hră. Tui anun, rơkâo 100% anih pơphun plĕ hră amăng tơring čar ngă tui djơ̆ hơdră pơgang klin Covid-19; hơmâo pruih pơgang hăng Cloramin B hlâo hăng tơdơi kơ mông plĕ hră; hơdôm bruă mă amăng hrơi plĕ hră khŏm ngă tui tơlơi pơtrun 5K mơng ding jum ia jrao.

Siu Đoan: Pơblang