VOV4.Jarai - Tui hăng tơlơi pơsit mơng Ding jum pơtô hrăm kơ tơlơi pơtrun pơsit pơplông abih anih 12, Jơnum min mơnuih ƀon sang tơring čar Gialai tŭ yap akŏ bruă pơphun pơplông abih anih 12 thun 2021. Jơnum min mơnuih ƀon sang tơring čar Gialai rơkâo Khua gơnong bruă pơtô hrăm gum hrŏm hăng hơdôm anom bruă bơdjơ̆ nao pơphun pơplông abih anih 12 thun 2021 brơi pơhlôm rơnuk rơnua, tơpă sit, djơ̆ tơlơi pơkă, biă mă ñu lĕ rơnuk rơnua amăng hrơi blan klin Covid-19 glăk lar hyu. Tal pơplông abih anih 12 amra pơphun amăng 2 hrơi (lơ 7 hăng 8 blan 7) hăng 5 tơlơi hrăm anun lĕ:3 tơlơi hrăm pơplông phara anun lĕ Toán, Ngữ Văn, Ngọai Ngữ hăng 2 tơlơi hrăm pơgôp hrŏm anun lĕ Khoa học tự nhiên, Khoa học xã hội. Hơdôm sang hră pơphun pơplông amăng tơring čar Gialai amra tŭ mă hră pơ-ar čih anăn čơđai nao pơplông mơng lơ 27/4 hăng pơđut amăng 5 mông tlam lơ 11/5/2021.

Siu Đoan: Pơblang