VOV4.Jarai - Amăng hơdôm hrơi blung a pơphun hyu pel ĕp kiăng pơhlôm rơnuk rơnua amăng hơdôm hrơi pơdơi prong lơ 30/4 hăng lơ 1/5, pơplôm brơi tal plĕ hră ruah Khua pơ ala mơnuih ƀon sang dêh čar tal XV hăng khua khul pơ ala mơnuih ƀon sang djop gưl rơwang thun 2021-2026, tơhan wai lăng jơlan glông đơ đam dêh čar hơmâo pel ĕp, ƀuh giăm 9 rơbâo čô ngă soh lơ̆m đuăi rơdêh amăng jơlan; phak giăm 10 klai prăk. Sit biă ñu, anom bruă bơdjơ̆ nao hơmâo ĕp ƀuh hăng pơsir hĭ rơbêh 600 čô mơnuih mơgăt rơdêh mơñum tơpai ƀiêr, 5 čô mơnuih djup hŏt ma tuý.

Amăng jơlan rơdêh treng, hơdôm anom bruă wai lăng jơlan glông hơmâo pơphun lu tal hyu pel ĕp, pơhlôm rơnuk rơnua ƀơi 3 ară jơlan, 5 boh rơdêh treng pơgiăng tuai; ngă tui khut khăt hơdôm hơdră pơgang klin Covid-19. Amăng mơguah lơ 16/4 mơtăm, grup hyu pel ĕp hơmâo ƀuh 4 mơnuih mơgăt rơdêh djup hŏt ma tuý hăng mơñum tơpai ƀiêr amăng hơdôm hrơi pel ĕp blung a amăng jơlan rơdêh đuăi hmar Hà Nội-Thái Nguyên. Tui hăng tơlơi pơsit mrô 100/2019/NĐ-CP mơng Kơnuk kơna kơ bruă pơsir tơlơi ngă soh lơ̆m mơgăt rơdêh amăng jơlan glông, jơlan rơdêh treng, lơ̆m mơgăt rơdêh djup hŏt ma tuý, mơnuih mơgăt rơdêh amra phak mơng 30-40 klăk prăk, pơhrui glăi hră mơgăt rơdêh mơng 22-24 blan.

Siu Đoan: Pơblang