VOV4.Jarai-Tom brơi, lơ 19/4, Jơnum min kơ bruă mơnuih mơnam mơ̆ng Sang bruă khua pơ ala mơnuih ƀôn sang dêh čar ngă hrom Khul đah kơmơi ngă pô pơ ala mơnuih ƀôn sang Việt Nam, Khul ngă bruă wai lăng ƀing pơ ala gah Jơnum min git gai phun pơ ala mơnuih ƀôn sang Jơnum bơkơtuai gah kual Kơdư “Đah kơmơi tơbiă anăn ruah ngă pô pơ ala mơnuih ƀôn sang dêh čar, ƀing pơ ala mơnuih ƀôn sang djop gưl pơtrut ngă bơkơnar đah rơkơi đah kơmơi”.

Tui hăng hră lăi pơthâo, mrô đah kơmơi ngă pô pơ ala mơnuih ƀôn sang tal 14 hăng mrô đah kơmơi ngă pô pơ ala djop gưl thun 2016-2021 ƀơi 3 gưl lêng kơ lu hloh tal hlâo soh samơ̆ ăt aka ƀu djơ̆ tơhnal pơkă ôh.

Tui hăng tơlơi pơtrun, mrô đah kơmơi tơbiă anăn ngă pô pơ ala mơnuih ƀôn sang dêh čar, pơ ala djop gưl khom djop boh ƀiă 35%. Kiăng dưi ngă djop mrô anai, kiăng hơmâo hơdră bơblih kơtang biă mă, ngă bruă sa hnong, tŭ yua, khut khăt amăng bruă kơđi čar. Tơlơi lăp gleng nao hloh lĕ gir run, kơtưn hloh mơ̆ng ƀing đah kơmơi ngă ƀing pơ ala mơnuih ƀôn sang dêh čar, ngă pô pơ ala mơnuih ƀôn sang djop gưl.

Nay Jek: Pơblang